Bobonaro, 14 Outubru 2021

Diretór Ezekutivu Ajénsia Dezenvolvimentu Nasionál, Institutu Públiku (ADN,IP) Eng. Mariano Renato M. da Cruz akompaña husi ekipa apoiu Gabinete DE hamutuk ho Koordenadora Unidade Kontrolu no Validasaun Kualidade ho nia Ekipa Tékniku Nasionál no munisípiu sira hala’o inspesaun konjunta hodi monitoriza projetu konstrusaun sira iha Ospitál Referal Maliana hanesan edifísiu Laboratóriu no edifísiu Izolamentu. Kinta (14/10).

Iha terrenu Diretór Ezekutivu husu ba ekipa tékniku kompañia sira atu aselera konstrusaun edifísiu Covid-19 hanesan Laboratóriu ne’ebé responsabeliza husi kompañia K-6 no enkuantu edifísiu Izolamentu implementa husi kompañia REMIS TADE Unip. Lda. 

Alende ne’e Diretór Ezekutivu mós ho nia ekipa tékniku sira halo inspeksaun ba projetu New Construction of Cirurgia Building in HR Maliana no projetu New Construction of Pediatric HR Maliana, ba konstrusaun edifísiu Cirurgia ne’ebé dadaun ne’e responsabiliza husi kompañia HUGOAMOR Unip. Lda no edifiísiu Pediatric hetan implementasaun husi kompañia FRATERNITY Unip. Lda, obra konstrusaun edifísiu rua ne’e agora dadaun ekipa kompañia sira hala’o ona servisu hada fundasi. 

Iha sorin seluk, Diretór ADN mós halo inspesaun hodi monitoriza projetu konstrusaun edifísiu Armagen Aimoruk Sames iha Maliana, ne’ebé implementa husi kompañia SEMBUHAN Unip. Lda. Hafoin ne’e mós Diretór ADN kontinua halo monitorizasaun ba projetu ponte new construction of steel truss one span bridge (type B – 100m) in Bulobo River, ne’ebé ezekuta husi kompañia NANANIU JV ADAM MOTOR. 

Alende inspesaun iha terrenu, Diretór Ezekutivu mós hala’o audiénsia ho reprezentante Prezidente Autoridade munisípiu Bobonaro Diretór Ajénsia no Planeamentu Sr. Semedo Laku Costa hodi ko’alia kona-ba koordenasaun servisu iha nível tékniku ba projetu konstrusaun sira iha munisípiu em relasaun ba projetu sira ne’ebé daudaun ne’e pendente no nia data kontratu liu ona . 

Objetivu sorumutu ne’e, oinsa estabelese koordenasaun servisu ne’ebé di’ak hodi hadi´a efetivamente sistema komunikasaun iha nível tékniku hamutuk ho autoridade sira, nune’e mós iha kompromisu atu fornese dadus no informasaun ba malu kona-ba projetu konstrusaun foun sira, ne´ebé la´o hela. Nune´e, sira mós kompartilla opiniaun ba malu kona-ba transparánsia públiku ba projetu sira husi Fundu Infra-estrutura hanesan: Programa Dezenvolvimentu Infra-estrutura Munisipál (PDIM) no mós projetu Asian Development Bank (ADB) nian.

Mídia ADN