DIRETÓR ADN, IP ATUALIZA REZULTADU SERBISU ADN, IP IHA SEMINÁRIU ´´REZULTADU AVALIASAUN EX-POST BA PROJETU INFRAESTRUTURA IHA TIMOR-LESTE

Loron-tersa, 30 Novembru 2021: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato M. da Cruz akompaña husi koordenadór sira Unidade Avaliação de Projetos (UAP), Unidade Controlo e Validação de Qualidades (UCVQ), Unidade Estudos e Desenvolvimento de Competências (UEDC) no Equipa Validação Base de Dados hodi aprezenta rezultadu serbisu ADN, IP iha semináriu´´ Rezultadu Avaliasaun Ex-Post ba Projetu Infraestrutura iha Timor-Leste ne´ebé prezide husi VPM & MPO  no Prezidente CAFI, Eng. José Maria dos Reis iha salaun auditóriu Kay Rala Xanana Gusmão, Ministériu Finansas, Aitarak Laran, Díli.

Diretór Ezekutivu ADN, IP hanesan mós oradór prinsipál ba semináriu ne´e hatete katak atu garante kualidade ba projetu infraestrutura iha territóriu nasionál presiza haree didi´ak ba faze 4 (hat) importante hanesan: kria sistema servisu ne´ebé di´ak, etapa servisu, formatu servisu nomós supervizaun diariamente iha terrenu.

´´Wainhira konseitu haat ne´e mak la implementa iha terrenu ita lalikan ko´alia kona-ba kualidade servisu iha terrenu´´tenik Diretór Ezekutivu, Eng. Mariano Renato.

ADN iha nia papel importante mak halo avalisaun previa no sertifika ba projetu kapitál dezenvlovimentu, halo avaliasaun previa no sertifika ba projetu sira ho kategoria montante bot liu $50.000, elabora Standarizaun Tékniku ne´ebé relasiona ho Dezenvolvimentu Infraestrutura iha Timor-Leste.

Projetu verifikasaun ne´ebé ADN halo iha tinan 2021 bazeia ba livru OJE 2021, totál projetu 948, submisaun dokumentu ba ADN halo verifikasaun previa projetu 775 no verfika ona projetu 680, devolve hikas projetu 64 no dadaun ne´e ADN verifika hela projetu 31.

Iha biban ne´e mós Diretór Ezekutivu ADN preokupa hela ho projetu 237 ne´ebé tama iha lista no iha osan maibé ladauk haruka ba ADN atu halo verifikasau ba dokumentu sira to´o agora, enkuantu tinan fiskál 2021 mós besik remata ona.

Diretór Ezekutivu aprezenta dezafiu ne´ebé instituisaun infrenta sukat ho forsa traballu ADN, IP nian ne´ebé iha funsionáriu na´in-150 (atus ida lima-nulu) kompostu Diretór Ezekutivu, Adjuntu Diretór, injiñeiru, administrasaun, asesór nasionál no internasionál.

´´Atu halo atendimentu másimu ba projetu tuir kada setór hanesan agrikultura, agua e saneamentu, edukasaun, komérsiu no seluk tan presiza aumentu tán númeru funsionáriu´´rekomenda lideransa ADN ba governu. 

Alénde ne´e mós projetu barak la halo estudu viabilidade, laiha supervizaun diáriu iha terrenu, projetu balun liu tiha tinan ida mak foin implementa, levantamentu dadus la kondiz ho terrenu atuál, kompañia barak laiha injiñeiru permanente inklui entidade barak mak sidauk uza livru mata dalan standarizasaun ne´ebé governu produz hanesan TL-SMM, TL-SUP, Mata Dalan ba Estudu Viabilidade, Padraun MOPTC 2014.

Alternativu seluk ne´ebé ADN halo ona mak identifika fatin ba quary ka materiál lokál nian, kontinua sosializa livru TL-SUP nomós update TL-SUP kada tinan.

VPM & MPO  no Prezidente Conselho de Administração do Fundo das Infraestruturas (CAFI), realsa mós katak papel ADN nian importante tebes ba reforma setór infraestruturas, atu mellora sistema no hasa’e kualidade infraestrutura iha rai laran no hanesan entidade ne´ebé responsável ba promosaun avaliasaun rigorozu husi projetu infraestrutura, hahú husi faze planeamentu, verifikasaun previa, nomós iha faze implementasaun to’o konkluzaun obra, liu husi prosesu kontrolu kualidade.

Durante semináriu ne’e mós hetan observasaun no orientasaun husi Primeiru Ministru Taur Matan Ruak iha nível polítiku, konsellu balun husi Dr. Mari Alkatiri liu husi partilla experiensia, nu´udar Eis Primeiru Ministru no Eis Prezidente RAEOA-ZEEMS, kona-ba polítika iha ámbitu dezenvolvimentu nasionál.

Partisipa iha eventu ne´e membru CAFI, membru governu, diretór jerál husi kada instituisaun, Ajensia Internasionál hanesan JICA, ONU, ADB, setór privadu no média nasionál sira.

Mídia ADN