ADN HO LEGÁL MPO ENKONTRU HO FUNSAUN PÚBLIKA DISKUTI DEKRETU GOVERNU 2021 BA REMUNERASAUN TRABALLADÓR MOLOK LORI BA KONSELLU MINISTRU

Loron-kuarta, 23 Dezembru 2021: Diretór Ezekutivu Ajénsia Dezenvolvimentu, Institutu Públiku (ADN. IP) Eng. Mariano Renato M. da Cruz akompaña husi Adjunto Eng. Januario Guterres, no asesór legál husi Ministériu Planu Ordenamentu (MPO) hala´o sorumutu ho Komisáriu Komisaun Funsaun Públika, portfóliu ba Planeamentu Forsa Traballu, Avaliasaun Dezempeñu, Formasaun no Dezenvolvimentu, António Freitas hodi diskuti kona-ba dekretu governu 2021 ba remunerasaun traballadór sira, Ajénsia Dezenvolvimentu Nasional Institutu Públiku. (ADN.IP) molok lori ba Konsellu Ministru. Reuniaun ne´e hala´o iha sala reuniaun KFP.

Iha enkontru ne´e Komisáriu Komisaun Funsaun Públika, husu lista salariál ADN.IP atuál hodi ajusta tuir lei armonizasaun ba kondisaun sira ne´ebé atualmente ADN iha, atu iha futuru labele hamosu injustisa remuneratóriu ba traballadór sira.

Nune´e Komisáriu KFP António Freitas konfirma ba ekipa ADN. IP katak, lejislasaun ne’e avansa duni tuir ninia natureza tenke revé hikas fali maibé, depende ba iha vizaun ADN. IP nian ba futuru hodi bele uza grau ka tékniku espesiál bazeia ba natureza servisu nia risku.

Husi sorin seluk Diretór Ezekutivu ADN. IP no ekipa husu karik lei permiti no iha konkordánsia atu defini arminizaun ne´e tenki haree no halo diferensa entre grau, tékniku superior no profisionál, wainhira iha ona konsensu, atu fó apoiu ba malu nune´e semana oin lori dekretu governu 2021 aprezenta ba Vise-Primeiru Ministru hodi lori ba Konsellu Ministrus halo aprovasaun ba ninia implementasaun.

Mídia ADN