Loron Segunda, 20 Dezembru 2021: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz ho nia Adjuntu Eng. Januario M. Guterres hamutuk ho koodenadór, asesór no funsionáriu sira tomak ADN hala'o retiru datoluk ho tema “Ho Retiru Ita Avalia Dezempeñu no Projeta Ita-nia Mehi Atu Servi Di'ak Liután Ita-nia Rain” ne´ebé realiza iha salaun Mahoka, Surikmas, Díli. 

Objetivu husi retiru ne’e, atu ida-idak halo reflesaun ba ida-idak nia aan kona-ba responsabilidade serbisu durante iha tinan 2021 no avalia falla ne'ebé infrenta hodi hadi'a di'ak liután prestasaun sevisu iha futuru. Nune’e konvida mós padre Wendy Jebato SDV hodi halo aprezentasau kona-ba reflesaun ho tema “rekonsilasaun no moris foun” relasiona ho servisu no hahalok knar moris nian ida-idak. 

Diretór Ezekutivu mós agradese ba ekipa tomak ne’ebé ho antusiazmu partisipa retiru no husu ba funsionariu sira ida-idak presiza hateke ba kotuk hodi reflete hikas kona-ba saida mak halo ona no sai nu´udar bukae ida atu hadi´a di´ak liután buat ne’ebé sedauk atinji iha 2021 no ba tinan 2022 atu labele repete erru hanesan.

Alende ne’e, Adjuntu Diretór Ezekutivu mós halo aprezenta kona-ba rezultadu servisu husi fulan Janeiru to'o Dezembru 2021 no planu no programa servisu ADN nian ba 2022. 

Xefe Rekursus Humanu Sr. Tomas Magno lidera mós sesaun diskusaun ida haree kona-ba jestaun serbisu ADN no hamosu konsensu ida husi partisipante sira hotu hodi hasai desizaun no asina rezolusaun ida husi Diretór Ezekutivu, Adjuntu, nomós Koordenadór na'in-haat hanesan baze ou guia ida ba implementasaun sebisu tuir programa ADN nian ba tinan fiskál 2022. 

Aproveita mós iha biban ne´e Diretór Ezekutivu hato´o

KSOLOK NATAL 2021 LORI PAZ, ARMONIA NO DOMIN!

NO TINAN FOUN KMANEK 2022 LORI ESPERANSA, UNIDADE NO PROSPERIDADE! ba funsionáriu ADN tomak.