DIRETÓR EZEKUTIVU ADN HALO APREZENTASAUN BA VPM/MPO KONA-BA AVALIASAUN EZEKUSAUN ORSAMENTU 2021 NO PLANU EZEKUSAUN ORSAMENTU 2022
- Publika husi: Ela
- Loron: 18/Jan/2022
Loron-sesta, 14 Janeiru 2022: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz, akompaña husi Adjuntu Eng. Januario M. Guterres hamutuk ho koordenadór sira halo’o enkontru ho S.E VPM/MPO ne’ebé akompaña mós husi Xefe Gabinete Ministru nian hodi ko´alia kona-ba avaliasaun ezekusaun orsamentu 2021 no planu ezekusaun orsamentu ba tinan 2022 nian iha sala reuniaun MPO/ADN.
Iha sorumutu ne’e, Diretór Ezekutivu halo aprezentasaun kona-ba volume servisu verifikasaun no inspesaun, ADN nia forsa trabalu tinan 2021 sumáriu ba ezekusaun orsamentu tuir programa sira, istória taxa ezekusaun orsamentu 2011 to’o 2021, sumáriu alokasaun orsamentu ba tinan fiskál 2022, rezultadu servisu inspesaun ba tinan 2021 nomós rezultadu servisu husi kada Unidade sira hotu.
Nune’e, S.E VPM/MPO apresia ho rezultadu servisu hotu ne’ebé Diretór Ezekutivu aprezenta, nune´e Governante ne´e husu atu ADN atu mellora nafatin servisu no mantén komunikasaun di´ak ho ministériu no entidade hotu-hotu hodi hala’o servisu inspesaun no verifikasaun nian.
Alende ne’e, S.E VPM mós fó hanoin kona-ba oinsa bele garantia kualidade infra-estrutura hotu presiza prepara kapasitasaun ba enjeñeiru sira liu husi formasaun ruma no tenke identifika lolos materiál hirak ne’ebé tama mai Timor presiza haree didi´ak sasan ne’ebé bele kategoria tuir estandarizasaun.
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;