KOORDENADORA UCVQ HO EKIPA HALA’O REUNIAUN KOORDENASAUN HO AUTORIDADE MUNISIPÁL SIRA HODI INFORMA KONA-BA FINALIZASAUN PROJETU PDIM

Díli, 7 Abril 2022: Ajénsia Dezenvolvimentu Nasionál, Institutu Públiku (ADN, IP) Koordenadora Unidade Kontrolu Validasaun Kualidade (UCVQ) Eng. Emerenciana da Costa Maia Freitas reprezenta Diretór Ezekutivu, hamutuk ho Koordenadór UGA Sr. Nelson Soares Pinto, Pontu Vokál PDIM, Eng. Demistocles Graciliano Ximenes no Eng. Equipa base de Dados Sra. Susana Sinala do Rego Amaral hala’o enkontru koordenasaun ho autoridade munispál sira hodi informa kona-ba projetu Planeamentu ba Dezenvolvimentu Integradu Munisipál (PDIM) ninian atu aselera finalizasaun ba projetu sira iha tinan ida ne’e.

Reuniaun ne’ebé hala’o hahú husi dia 28 Marsu to’o dia 6 Abril 2022 ne'e hodi koordena ho Prezidente Autoridade Munisipál hanesan Díli, Ermera no Bobonaro, Administradór munisipál sira hanesan Ainaro, Covalima, Manufahi, Viqueque, Manatuto no Liquiça nomós Diretór PDIM sira, Enjiñeiru Munisípiu inklui kompañia responsável sira hodi informa kona-ba projetu PDIM sira ne’ebé implementa iha kada munisípiu.

Husi enkontru hirak ne’ebé realiza rona mós preokupasaun husi kontratór sira nomós orienta ona diretór kompañia sira atu finaliza lalais iha tempu badak nune’e bele halo prosesu pagamentu tanba projetu PDIM hahú dezde 2021 no tinan 2022 ba oin sei la iha tan alokansaun orsamentu ba ADN, IP bazei ba Dekretu Governu no 13/2022, Ezekusaun Orsamentu Jerál Estadu ninian ba 2022 tanba ne’e parte ADN halo koordenasaun ho autoridade munisipál sira atu halo jestaun tempu hodi aselera finalizasun ba projetu sira.

Projetu on goin ka la’o hela iha munisípiu Ainaro iha projetu 6, munisípiu Covalima iha projetu 3, munisípiu Manufahi projetu 7, munisípiu Viqueque projetu 2, munisípiu Manatuto iha projetu 12, Díli iha projetu 7, Ermera 3, Liquiça 3 no Bononaro 8.

Projetu hirak ne’e hahú implemetan entre tinan 2016 to’o 2019 ne’ebé mak sidauk konklui.

Mídia ADN