DIRETÓR EZEKUTIVU ASISTE ASINATURA KONTRATU AKIZISAUN NO INSTALASAUN KABU SUBMARINU FIBRA ÓPTIKA ENTRE GOVERNU TIMOR-LESTE HO KOMPAÑIA ALCATEL SUBMARINE NETWORKS (ASN)

Loron-tersa, 31 Maiu 2022: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz, akompana husi Koordenador Gestaun Administrativa Sr. Nelson Soares Pinto, Asesora Sra. Epi Orleães nomós Assessor ICT Sr. Romualdo Duarte Guterres ne'ebe hanesan mós Koordenadór grupu tékniku interministeriál ba projetu Cabo Fibra Optica-Timor-Leste South Submarine Cable (TLSSC) partisipa iha serimonia asinatura entre Governu Timor-Leste no kompañia Alcatel Submarine Networks (ASN) kona-ba Kontratu Akizisaun no Instalasaun Kabu Submarinu Fibra Óptika, ne'ebe hala'o iha Palacio do Governo.

VIII Governu Konstitusionál liu hosi Komisaun Interministeriál ba implementasaun sistema kabu submarinu fibra óptika, kompostu hosi Vise-Primeiru-Ministru no Ministru Planu no Ordenamentu, nu’udar Prezidente, Ministru Koordenadór ba Asuntu Ekonómikus, Ministru Finansas, MinistruTransportes no Telekomunikasaun, no kompañia Alcatel Submarine Networks (ASN), halo asinatura ba Kontratu Akizisaun no Instalasaun Kabu Submarinu Fibra Óptika.

Iha intervensaun Sua Exelénsia Primeiru-Ministru, fó apresiasaun ba servisu ne’ebé Komisaun Interministeriál, ne’ebé lidera husi Sua Exelénsia Vise-Primeiru-Ministru no Ministru Planu no Ordenamentu, hala’o, nune’e mós apresia servisu husi Grupu tékniku. Liu husi sira nia esforsu hotu mak Timor-Leste hakat tan pasu pozitivu ida iha projetu estratéjiku ida, asinatura ba Kontratu Akizisaun no Instalasaun husi ligasaun dijitál Timor-Leste nian, liu hosi kabu submarinu fibra óptika, ba Sidade Darwin no Port Hedland iha Commonwealth da Austrália, atu bele kumpre objetivu ida ne’ebé estabelese iha Programa VIII Governu: “posibilidade asesu internet ba timor-oan hotu”

Xefi Governu mós realsa tan katak: “Garantia ba timor-oan hotu asesu internet la’ós kestaun asesibilidade ba ema hotu, iha territóriu laran tomak, maibé relasiona mós ho asesu internet ho folin asesivel ba ema hotu. Infraestrutura ida ne’e sei loke dalan ba timor-oan hotu, independentemente ba nia kbiit atu iha asesu ba internet.

Ida ne’e mós hanesan pasu importante ida ba diversifikasaun ekonómika no hamenus dependénsia ba setór Petrolíferu.”

Iha serimónia ida ne’e Exelénsia Vise-PM no Ministru Planu no Ordenamentu, Eng. José Maria dos Reis, hatete mós katak loron ohin nian “VIII Governu Constitucional mós marka tan pasu ida ba iha reforma sira ne’ebé Governu halo hela daudaun iha setór teknolojia no informasaun, hodi aproxima Timor-Leste iha Era Dijitál”

Iha diskursu Senhor Vise-Primeiru-Ministru José Reis manifesta haksolok tamba projetu ida ne’e finansia 100% hosi orsamentu Governu Timor-Leste nian.

Iha nia intervensaun, Prezidente Komisaun Interministeriál sita mós servisu balun ne’ebé Komisaun interministeriál no Grupu Tékniku hala’o tiha.

Xefe Ezekutivu no Prezidente Komisaun Interministeriál hato’o agradesimentu ba apoiu ne’ebé Governu da Austrália sempre fó ba Timor-Leste, nu’udar parseiru Governu Timor-Leste nian iha projetu ida ne’e, liu hosi dezenvolvimentu ba estudu FEED (Front and Engeneering design).

Governu anunsia mós katak, projetu ida ne’e sei la termina ho instalasaun Kabu Submarinu Fibra Óptika, maibé fó posibilidade atu halo ligasaun foun no afirma katak sei estabelese Empreza Públika, ida ne’ebé sei halo jestaun, operasionalizasaun no manutensaun ba investimentu boot ida ne’e.

Serimónia asinatura akordu ida ne’e, hala’o iha Palásiu Governu no hetan partisipasaun espesiál husi S.E. Primeiru-Ministru, Senhor Taur Matan Ruak, S.E. Ministru Finansas Dr. Rui Gomes, S.E. Ministru das Obras Públikas, Senhor Abel Pires, S.E. Ministru Transporte no Telekomunikasaun Dr. Agostinho da Silva, S.E Ministru da Justisa Dr. Tiago Amaral Sarmento, S.E. Embaixadór Australia iha Timor Leste Sr. Bill Costello, no inklui grupu tékniku interministeriál.