ANETL HO ADN REALIZA SERIMÓNIA ASINATURA MEMORANDO DE ENTENDIMENTO

Loron-kuarta, 25 Maiu 2022: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz akompaña husi Adjuntu Eng. Januario M. Guterres hamutuk ho koordenadór no tékniku sira realiza serimónia asinatura Memorando de Entendimento entre Asosiasaun Nasionál Enjeñeiru Timor Leste (ANETL) ho ADN.IP, iha Salaun enkontru MPO/ADN.

Iha serimónia ne’e Diretór Ezekutivu esplika objetivu husi serimonia ida ne’e atu bele halo kooperasaun di’ak liután ho Asosiasun Nasionál Enjeñeiru Timor Leste (ANETL) hodi servisu hamutuk liu husi fó formasaun ba enjeñeiru timoroan sira hotu iha área oin-oin. Liu-liu ba estudante sira ne’ebé foin remata estudu iha área enjeñaria nian nune’e atu sira hasa’e liután koñesimentu hodi bele fasilita nesesidade governu nomós emprezáriu sira nia serbisu ba kontribuisaun dezenvolvimentu nasaun nian.

Prezidente (ANETL) Eng. Armando de Almeida reprezenta membru ANETL hotu agradesimentu ba kooperasaun entre ANETL ho ADN, I.P tanba husi diskusaun sira ne’ebé durante ne’e hala’o hamutuk ho ADN  mak ohin loron konsege konklui liu husi serimónia asina memorandu. Nune’e nia orgullu mós tanba  ADN.IP  nia ezisténsia ne’ebé alende halo fiskalizasaun ba obra sira, haree mós kona-ba kapasitasaun liu husi formasaun ba enjeñeiru sivil nomós arquitetura ho objetivu atu kapasita hodi garante kualidade rekursus humanus nomós garante produtu ida di’ak liu iha futuru.

Serimónia asinatura ne’e realiza tanba ho esforsu maka’as husi tékniku ADN ne’ebé responsabiliza husi Koordenadora Unidade Estudu Dezenvolvimentu Kompeténsia Arq. Valentina Violet Correia Bianco ho ekipa.

Marka prezensa iha asintura Memorando de Entendimento ne’e Diretor Geral Ordenamentu Territóriu (DGOT) ho nia ekipa, Presidente Câmara Comércio e Indústria de Timor-Leste (CCI-TL) ho nia ekipa enklui mós ekipa ANTEL nomos tékniku ADN.IP.