REUNIAUN KOODENASAUN SERBISU ENTRE DIRETÓR EZEKUTIVU ADN HO DIRETÓR MOP MUNISÍPIU VIQUEQUE

Loron tersa, 26 jullu 2022 - Diretór Ezekutivu Ajénsia Dezenvolvimentu Nasionál, Institutu Públiku (ADN, I.P.) Eng. Mariano Renato M. da Cruz, akompaña husi Chefe Seção Departamento Infraestruturas de Transportes Eng. Aniceto da Costa ho enjeñeiru ADN Munisípiu Viqueque hala’o reuniaun ho Diretór Ministériu Obras Públika (MOP) Munisípiu Viqueque Sr. Mario do Rego iha sala enkontru edifísiu MOP, Viqueque.

Reuniaun koordenasaun ne’e partilla informasaun ba malu kona-ba oinsa mak bele halo kooperasaun serbisu hodi aselera prosesu kontrusaun infraestrutura sira ne’ebé implementa iha munisípiu Viqueque.

“Atribuisaun lei ba ADN ho MOP bele la hanesan maibé governu ida de’it, tanba ne’e presiza kooperasaun ida di’ak hodi bele tau matan ba projetu sira ne’ebé implementa iha munisípiu ne’e la’o ho di’ak” dehan DE ADN.

Diretór Ezekutivu ne’e husu atu hadi’a liña koordenasau liu husi komunikasaun ne’ebé di’ak, tantu husi dono do projeto ka husi kompañia implementadór atu nune’e bele garante kualidade ba projetu sira.

Diretór Ezekutivu realsa tán katak atu garante kualidade ba projetu ida sei la monu husi lalehan, wainhira la kumpri etap serbisu, sistema serbisu, formatu serbisu no mós supervizaun diáriu iha terrenu.

Chefe Seção Departamento Infraestruturas de Transportes, Eng. Aniceto da Costa hatutan tan katak, ADN ho Obras Públikas presiza la’o hamutuk mak hodi asegura kualidade ba projetsu infraestrutura sira hotu atu liu-liu atu haree kona-ba serbisu inspesaun konjunta entre parte rua.

Hafoin enkontru Diretór Ezekutivu ADN liu ba Administrasaun Munisípiu Viqueque hodi hasoru malu ho Administradór Munisípiu Sr. Januario Soares (Bolly) hodi entrega mós relatóriu mensál enjeñeiru ADN munisípiu nian hanesan evidénsia ba ADN ninia knar halo kontrolu ba projetu infraestrutura sira ne’ebé implementa iha munisípiu refere.