Manufahi, 29 Jullu 2022 Adjuntu Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Adjuntu Diretór Ezekutivu Eng. Januario M. Guterres akompaña husi koordenadór Unidade Gestaun Administrativa Sr. Nelson Soares Pinto no koordenadóra Unidade Avaliasaun Projetu Eng. Melenia da C. Barros hamutuk ho tékniku munisípiu sira hala'o enkontru ho Administradór no mós Diretór Projetu Dezenvolvimentu Integradu Munisipál (PDIM) iha munisípiu Tolu Bobonaru, Covalima no Manufahi. 

Objetivu husi sorumutu ne’e hodi ko'alia kona-ba projetu PDIM ne'ebé implementa iha munisípiu hirak ne’e iha faze retensaun, nune’e presiza halo liña koordenasaun atu aselera servisu hirak  ne’e hodi hasa'e ezekusaun orsamentu ba tinan ida ne’e nian. 

Aleinde ne’e ko'alia mós kona-ba ADN prepara formasaun tékniku ba enjeñeiru lokál sira atu bele partisipa hodi hasa'e liu tan sira nia koñesimentu ba tékniku munisípiu iha área enjeñeiru nian, nune'e fasilita mós sira atu kontrola projetu ne'ebé la'o iha sira nia munisípiu. 

Hafoin diskusaun, ADN oferese mós relatóriu mensál ba administradór hodi sai hanesan informasaun ba autoridade lokál kona-ba projetu hotu ne'ebé implementa iha munisípiu ho status no atinjimentu progresu ba projetu ne'ebé iha.