DIRETÓR EZEKUTIVU HALO ENSERAMENTU FORMASAUN DURANTE LORON 5 IHA INAP

Dili - Loron 16 Setembru 2022- Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Eng. Mariano Renato Monteiro da Cruz ho nia Adjuntu Diretór Ezekutivu Eng. Januario M. Guterres ensera formasaun enjeñeiru sira nian durante loron 5 iha salaun INAP Comoro.

Iha serimónia enseramentu ne’e, Diretor ezekutivu agradese ba formadór sira ne’ebé oferese ona matéria ba formandu sira durante loron 5 nia laran no nia espera katak matéria hirak ne’ebé formandu sira hetan bele aumenta liu tan sira nia koñesimentu hodi implementa iha fatin servisu nian. Aleinde ne’e nia husu atu parte FDCH kontinua apoiu fundus atu kontinua formasaun ne’e, tanba ADN. IP nia servisu atu kontrola projetu hotu ne’ebé la’o iha Timor laran tomak, tanba ne’e presiza tebes atu fó formasaun ba enjeñeiru sira hodi bele hasa’e sira nia koñesimentu atu bele garantia kualidade projetu liu skill ne’ebé sira hetan. Diretór Ezekutivu hein katak, rezultadu (output) husi tékniku sira nia partisipasaun ne’e di'ak, atu nune’e bele kontinua haruka sira tuir formasaun iha etapa tuir mai.

Nune’e mós Diretor Timor Delta Solusindo (TDS) Sr. Usep Saepulloh agradese ba koordenasaun servisu ida ne’e no nia espera katak matéria hirak ne’ebé oferese husi sira nia treinadór bele fó benefísiu ba formandu sira hodi implementa servisu liuliu kona-ba jestaun projetu nian. Nune’e, sira sei hato’o relatóriu ba ADN.IP no mós INAP atu relata kona-ba rezultadu husi formandu sira nia partisipasaun no komprensaun ba matéria ne’ebé sira aprende durante ne’e.

Enkuantu, partisipante hirak ne’e kompostu husi enjeñeiru ADN.IP hamutuk na'in-18 no mós enjeñeiru husi INAP na'in 2. Tuir observasaun, formandu sira partisipa másimu no entuziasmu tebes hodi aprende kona-ba matéria ba “Construction manegment and supervising multiple project” ne’ebé oferese husi formadór TDS sira.