Díli 1 Setembru 2022 - Diretór Ezekutivu ADN, I.P, Eng. Mariano Renato Monterio da Cruz ho nia Diretór Adjuntu, Eng. Januario Maia Guterres hamutuk ho ekipa reuni ho Doretór Jerál husi liña ministériu no mós instituisaun Estadu nian hodi sosializa informasaun prosesu pagamentu ba projetu infraestrutura sira bazeia ba orientasaun Conselho de Administração do Fundo das Infraestruturas (CAFI) iha fulan jullu liu ba, iha salaun reuniaun MPO/ADN.

Reuniaun ne’e ADN organiza hodi envolve kargu xefi sira husi liña ministériu no instituisaun Estadu nian atu rona opiniaun husi parte ida-idak hodi ajusta ba dezeñu formatu ne’ebé CAFI orienta tékniku ADN, CAN, SGP ho Diresaun Jerál Tezouru iha Ministériu Finansas

prepara tiha ona nune’e ba oin fasilita lalais liu tan prosesu pagamentu ba fundu infraestrutura nian.

Diretór Ezekutivu iha introdusaun ne’e hateten durante ne’e husi entidade oioin kestiona kona-ba prosesu pagamentu ba obra infraestrutura nian tanba ne’e liu husi reuniaun ne’e sosializa informasaun ne’ebé CAFI orienta tékniku ADN, CAN, SGP ho Diresaun Jerál Tezouru iha Ministériu Finansas mak prepara formatu flowchart/fluxograma ne’ebé durante ne’e la’o hela maibé buka mekanizmu atu habadak ninia prosesu no nafatin kumpri lei.

“Enkontru ida ne’e atu sosializa de’it informasaun kona-ba desizaun CAFI relasiona ho pagamentu ne’ebé ema barak kestiona dehan tempu ne’e naruk demais liu tanba ne’e buka meiu atu habadak maibé tuir regras no lei ne’ebé haruka atu ita serbisu” dehan Diretór Ezekutivu

Diretór Ezekutivu mós husu ba parte hotu-hotu atu fó opiniaun ba formatu ne’ebé parte tékniku prepara ona hodi bele ajusta nune’e bele rezolve problema ne’ebé durante ne’e infrenta no buka meius halo transparánsia ba informasaun sira.

Iha Flowchart ho ninia kritériu ou cheklist ne’ebé ami halo hela draft, husu ba kargu diretór sira karik buat ruma sidauk tama bele sujere hodi aumenta no halo nusa mak ita submete dokumentu mai iha ne’e, tenki bazeia ba cheklist para ita bele halo verifikasaun, inspesaun atu fasilita tiha prosesu pagamentu ho lalais.

“Ita buka meius hamosu koseitu sira hanesan ne’e para sosializa ba malu la’ós perfeitu agora maibé ba tinan oin iha parte ne’ebé mak laiha ita hadi’a no ajusta maibé ita tenki hamutuk hodi halo konseitu ida de’it, la’ós lori governu rua ka tolu maibé hamutuk ida de’it atu koordena malu oinsa fasilita ita-nia emprezáriu sira no mós hato’o ba nai ulun sira ba oin wainhira implementa projetu tenki tuir dalan no tuir tempu ne’ebé mak iha” akresenta.

Iha biban ne’e Diretór Adjuntu mak halo aprezentasaun kona-ba desizaun CAFI iha fulan jullu hodi orienta ba tékniku ADN, CAN, SGP ho Diresaun Jerál Tezouru, koko dezeña hela flowchart ida liga ho prosesu ne’ebé mak durante ne’e la’o hela.

Diretór Adjuntu iha aprezentasaun ne’e hateten wainhira ema hotu kumpri kritéria, prosesu no períudu pagamentu ne’ebé iha mak sei rezolve problema ne’ebé durante ne’e infrenta. Tanba ne’e presiza ita hotu nia atensaun didi’ak ba dokumentu sira atu nune’e ba oin labele atraza ninia prosesu pagamentu.

Aleinde ne’e mós Diretór Jerál balun hato’o sira ninia opiniaun no ba oin sei sosializa nafatin informasaun atu bele atualiza sistema dezeñu formatu ho di’ak liu tan atu parte hotu-hotu bele kumpri hodi aselara prosesu pagamentu ba obras infraestrutura sira ne’ebé implementa iha teritóriu tomak no fó benifísiu ba sidadaun hotu-hotu bele asesu ba obras konstrusaun sira ne’ebé estadu harii.