Díli, 23 Setembru 2022 - Diretór Ezekutivu Ajénsia Dezenvolvimentu Nasionál, Institutu Públiku (ADN, I.P.) Eng. Mariano Renato Monteiro da Cruz akompaña husi Koordenadóra Unidade Estudo e Desenvolvimento de Competências (UEDC) Arc. Valentina Violet Correia Bianco simu audiénsia husi Prezidente ANETL Eng. Armando de Almeida ne’ebé akompaña mós tékniku parte rua nian iha sala reuniaun Diretór Ezekutivu, Fatuhada.

Markasaun audiénsia husi Prezidente Asosiasaun Nasionál Enjeñeiru Timor Leste (ANETL) ne’e hodi informa ba Diretór Ezekutivu ho ekipa kona-ba MoU ne’ebé ANETL halo ho Malázia ba formasaun.

Prezidente ANETL hatete katak posibilidade iha fulan outubru sei haruka tékniku sira hodi ba tuir formasaun iha Malázia iha área ne’ebé instituisaun presiza maibé presiza tetu mós ho tempu ne’ebé apropriadu atu labele implika ba servisu diáriu tékniku sira nian tanba tuir kalkulasaun ba númeru formandu ba faze dahuluk ema na’in 5 ka na’in-8 mak ba sei ba uluk hafoin haree progresu di’ak mak planu ba oin bele aumenta tan númeru formandu.

Kooperasaun ba parseira formasaun ne’ebé ANETL ho Malázia ne'e la’ós formandu de’it mak ba Malázia maibé formadór mós bele mai fó formasaun iha Tiimor-Leste.

“Ita mós hanoin katak treinamentu ga formasaun la’ós halo iha ne’ebá de’it maibé formadór husi Malázia mós bele mai iha ne’e” dehan Prezidente ANETL.

Aleinde ne’e formasaun ne’ebé ANETL eskolla Malázia tanba haree ba kestaun komunikasaun ninian lian malaiu no indonézia parte rua bele entende malu no mós bele uza lian inglés.

Diretór Ezekutivu ADN apresia no aseita tebes ho polítika ANETL nian tanba bele halo parseria ho Malázia hodi fasilita formasaun ba tékniku sira hasa'e koñesimentu atu bele responsabiliza di’ak liu tan sira nia knaar liuliu responsavel ba kualidade projetu.

“Hasa’e koñesimentu ne’e parte ida importante tebes tanba ho mudansa ba teknolojia mundu ohin loron, aplikasaun sistema liga ho kreatividade no inovativu ne’e mosu kuaze loroloron tanba ne’e tékniku sira presiza aprende loroloron hodi bele responde ba dezafiu foun sira“.

ADN kompromete prontu halo selesaun ba staf sira liuliu ba sira ne’ebé iha boa vontade atu aprende hodi fó motivasaun ba staf sira seluk ba iha formasaun sira tuir mai.