ADN, I.P. HO MOP APREZENTA FLUXOGRAMA NO CHEKLIST BA SETÓR PRIVADU KONA-BA PROSESU PAGAMENTU PROJETU FUNDU INFRAESTRUTURA

Díli- loron 27 Setembru 2022- Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Eng. Mariano Renato Monteiro da Cruz ho Diretór Jerál Ministériu Obras Públika (Mop) Eng Rui Hernani konvoka reuniaun ho setór privadu inklui mós ho kompañia lokál sira hodi aprezenta fluxograma no cheklist kona-ba prosesu pagamentu projetu fundu infarestrutura sira, iha salaun MPO/ADN, I.P. Fatuhada.

Atividade ida ne’e realiza bazeia ba deliberasaun CAFI, ne’ebé fó kompeténsia ba ekipa sira hanesan ADN.IP, MOP, CNA no mós SGP hodi lidera obra ida ne’e ho objetivu husi Governu atu fahe informasaun ba setór privadu sira kona-ba prosesu pagamentu ba projetu fundu infraestrutura no mós liña ministeriál sira atu ne’e liu husi atividade ida ne’e fasilita sistema pagamentu hodi hasa’e liu tan ezekusaun orsamentu estadu nian.

Iha sesaun dahuluk ba aprezentasaun ne’e Diretór Adjuntu Eng. Januario M. Guterres, aprezentasaun kona-ba prosesu fluxograma no checklist ba pagamentu projetu fundu infraestrutura nian no mós projetu liña ministeriál atu fó informasaun loloos ba setór públiku no privadu sira hotu hodi nune’e bele la’o tuir prosesu refere.

Diretór Ezekutivu ADN, I.P. Eng. Mariano Rento Monteiro da Cruz aproveita mós hodi promove sistema hirak ne’ebé ADN, I.P. utiliza hodi kontrola servisu liu husi Sistema PMIS, LMS, GIS no mós Website ADN.IP nian. Diretór Ezekutivu akresenta mós katak sistema hirak ne’e hanesan meius ida atu fasilita instituisaun hodi halo arkivu ba dokumentu sira kona-ba verifikasaun no inspesaun inklui prosesu devolve dokumentu ba dono do projeto. Tanba ne’e Sistema dijitalizasaun ida ne’e sai hanesan provas ba públiku hodi asesu kona-ba prosesu hotu ne’ebé iha no la’o hela iha ADN, I.P.

Durante iha reuniaun ne’e setór privadu no kompañia sira apresia tebes ho aprezentasaun no ba sistema sistema sira maibé hato’o mós preokupasaun sira hodi nune’e kargu xefi sira atu hatutan ba governate sira hodi tau atesasaun ba setór privadu sira nia pappel nune’e, rai na’in labele sai bainaka iha nia rain rasik maibé oinsa mak estadu bele reforsa atu dezenvolve iha setór infrestrutra bele la’o di’ak ho envolvimentu husi setór hotu-hotu.

Antes ne’e ADN.IP, MOP, CNA no mos SGP mós promove ona sistema sira ne’e ho liña ministeriál sira bazeia ba desizaun CAFI ba utilizasaun sistema refere.

Marka prezensa iha atividade ne’e mós Diretór Nasionál Estrada Ponte Contolo no Cheias (DNPCCC/MOP, Diretór Jeral Tesouru Ministériu Finansa, Diretór Jerál Ministériu Interiór Vise Prezidente CCI-TL, koordenador sira ADN, tékniku sira no media nasionál.