ADN HO MOP KONTINUA SOSIALIZA FLOWCHART PROSESU PAGAMENTU PROJETU FUNDU INFRAESTRUTURA SIRA BA KOMPAÑIA IMPLEMENTADÓR PROJETU

Díli, 6 Outubru 2022 - Diretór Ezekutivu Ajénsia Dezenvolvimentu Nasionál (ADN, I.P.) Eng. Mariano Renato Monteiro da Cruz akompaña husi Diretór Adjuntu Eng. Januario Maia Guterres, Koordenadora UCVQ Eng. Emerenciana da Costa Maia Freitas ho Chefe Equipa Validação Base de Dados Eng. Susana Sinala do Rego Amaral partisipa iha reuniaun ne’ebé konvoka husi Ministériu Obras Públika kona-ba progresu konstrusaun pagamentu finál Fundu Infraestrutura fulan Novembru 2022 hodi informa ba kompañia implementadór projetu sira atu aselera finalizasaun nune’e hasa’e porsentu  ezekusaun fundu infraestrutura molok taka tinan fiskál 2022, reuniaun ne’e hala’o iha Salaun Auditoria UNTL, Fakuldade Enjeñaria Siénsia no Teknolojia, Hera.

 “Formatu flowchart ne’e la’ós buat foun ida, maibé ami nafatin informa hodi fasilita ita hotu oinsá koopera ba malu atu ita bele halo pagamentu lais liu. Hotu-hotu tenke la’o tuir regra, ita tenke hadi’a ita-nia sistema serbisu, etapa serbisu, formatu serbisu no supervizaun diáriu iha terenu atu bele aselera ezekusaun ba fundu infraestrutura iha territóriu tomak. Ami mós fahe ona informasaun ne’e ho liña ministériu sira inklui CCI-TL iha semana sira liu ba kotuk no tuir planu semana oin sei hamutuk ho MOP hodi sosializa ba munisípiu hotu-hotu atu parte hotu la’o tuir prosesu ne’ebé estabelese ona” Inforama Diretór Ezekutivu.

Diretór Ezekutivu ADN iha aprezentasaun flowchart ba prosesu pagamentu fundu infraestrutura, impréstimu inklui projetu liña ministeriál sira bazeia ba desizaun CAFI iha fulan-jullu hodi orienta ADN, CAN no SGP dezeñu formatu flowchart atu fasilita no aselera prosesu pagamentu ba fundu infraestrutura sira iha territóriu tomak ho durasaun tempu inklui prosesu sira mak hanesan tuir mai:

Fundu Infraestrutura no Impréstimu totál períodu tempu 26-40 dias mak hanesan:

- Empreza submete dokumentu ba Project Management Unit (PMU) no Direção Nacional de Estradas, Pontes e Controlo de Cheias (DNEPCC) iha Ministériu Obras Públika hodi halo prosesu hanesan: Analiza no Avalia Pedidu Pagamentu; Verifika progresu fíziku iha terenu; avalia dokumentu tékniku no legál; hafoin prepara sertifikadu pagamentu ho durasaun tempu (10-14 dias).

-  Ajénsia Dezenvolvimentu Nasionál (ADN): Halo inspesaun iha terenu no prepara relatóriu inspesaun ho tempu (10-14 dias)

-  Secretariado Grandes Projetos (SGP): Prepara PRT, EV, no TPO ho tempu (3-6 dias)

-  Ministériu Finansas no BCTL: Halo prosesu transferénsia ho tempu (3-6 dias).

Enkuantu ba Projetu Liña Ministeriál sira ho períodu tempu 24-40 dias mak hanesan:

- Empreza submete dokumentu ba Dono do Projeto: Verifika progresu fíziku obra iha terenu; Avalia no analiza dokumentu; prepara sertifikadu pagamentu ho tempu (10-15 dias).

- ADN halo inspesaun iha terenu no prepara relatóriu inspesaun nian ho tempu (10-14 dias). Hafoin ne’e dokumentu sei fila fali ba

- Dono do projeto – Prepara CPV, PO no PRT ho tempu (2-7 dias)

- MdF (Tezouru)- prodús TPO no halo transferénsia ho tempu (2-4 dias) hafoin ba Banku.

Prosesu ida ne’e mak imi tenke kumpre, ne’ebé ita presiza kumpre períodu tempu ne’ebé determina ona. Rekezitu sira ne’e responsavel husi kompañia sira hotu hatene saida mak presiza halo ou prepara tanba ne’e husu ba Ita-Boot sira tenke lee kontratu, se imi la lee kontratu hanesan de’it. Ezekutivu ADN hatutan tan katak kompañia sira wainhira hatama ona dokumentu tuir data ne’ebé determina ona tenke follow up, la’ós Ita-Boot sira hatama tiha dokumentu ne’e depois telefone mós dezligadu oinsá bele kontaktu hodi hadi’a erru.

Ita bele halo sala maibé halo iha fatin seluk fali, la’ós repete erru ne’ebé hanesan. Tanba ne’e husu ba kompañia ne’ebé kaer projetu ida, nia tenke iha komponente tolu importante  mak Manpower; Ekipamentu no Kapitál/fundus. Manpower ne’e inklui enjeñeiru sira, se iha ne’e mak ó-nia enjeñeiru laiha di’ak liu ó lalika kaer projetu. Ida ne’e mak kompañia responsavel ba projetu ida tenke halo. Informa DE ADN.

Diretór Kompañia no mós reprezentante sira apresia no agradese tebes ba esplikasaun flowchart ne’ebé sai hanesan mekanizmu ida di’ak bele fasilita liután sira nia serbisu nu’udar implementadór ba projetu sira.

Reuniaun ne’ebé lidera husi Ministru Obras Públikas (MOP), Eng. Abel Pires da Silva, apela ba kompaña sira atu aselera projetu sira hodi hasa’e ezekusaun orsamentu ministériu nian iha setór infraestrutura.

Marka prezensa mós iha reuniaun Vise Ministru Obras Públikas (MOP), Eng. Nicolau Lino Freitas Belo, Diretór Jerál Obras Públikas (DJOP), Eng. Rui Hernani, Diretór Jerál Administrasaun no Finansas Ministériu Obras Públikas (DJAF) Sr. Januário Barbosa Pereira, Diretór kompañia no reprezentante, inklui mós ho tékniku sira.