DIRETÓR EZEKUTIVU PARTISIPA LANSAMENTU FATUK DAHULUK BA KONSTRUSAUN EDIFÍSIU KFP E-RECRUITMENT

Díli, 14 fevereiru 2023 – Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) reprezenta Vise-Primeiru Ministru no Ministru Planu Ordenamentu, Eng. Mariano Renato Monteiro da Cruz, akompaña husi Xefe Departamentu Edifício Público Água e Saneamento Arq. Francisco Xavier de Deus Jeronimo no Eng. Manuel Estrela Soares de Oliveira asiste hamutuk asinatura kontratu no lansamentu fatuk dahuluk ba konstrusaun edifísiu Komisaun Funsaun Públika E-Recruitment iha Edifísiu KFP nia kotuk/Matadouro.

Lansamentu ne’e hahú ho asinatura kontratu ho kompañia kontratór Community Housing Limited Timor (CHLT) no kompañia konsultór ARCHTimor Engineering Consultant (AEC) in Association ADERROMA Engineering Consultant (ARECO) Ba Supervizaun Konstrusaun Edifisiu E-Recruitment. Projetu sei konstrui durante fulan 8 ho totál orsamentu USD 1.548,290.67.

Kompañia supervizór nian KFP hamutuk ho entidade Governu ne’ebé kompostu husi (ADN, CNA, SGP, Obras Públikas) realiza ona asinatura iha loron 7 fevereiru 2023 iha KFP, no ohin kontinua asina notice to proced hodi nune’e bele sai hanesan baze ida hodi hahú servisu ba konstrusaun edifisiu refere. Dezeñu ba BOQ edifísiu ne’e mai husi kompania The Oliveira ho modelu andar tolu.

Diretór Ezekutivu ADN, I.P. Eng. Mariano Renato Monteiro da Cruz reprezenta Vise-Primeiru Ministru no Ministru Planu Ordenamentu iha nia intervesaun ba konsultór no kompañia responsavel projetu halo jestaun serbisu/project management atu implementa obra tuir tempu no garante kualidade.

“Sujestaun ba dono do projeto em nome da ADN ha’u sei apoiu nafatin maibé dono do projeto ho nia team Project Management Unit (PMU) atu serbisu hamutuk ho konsultór hodi fó orientasaun nafatin ba kompañia hala’o serbisu tuir time schedule/oráriu ne’ebé mensiona iha kontratu” tenik DE ADN.

Laiha problema ida ne’ebé ita la bele rezolve wainhira ita iha komunikasaun ba malu, tanba ne’e liu husi komunikasaun mak sei fó solusaun ba problema ruma ne’ebé akontese. Kualidade ba edifísiu no atu harii tuir ninia tempu sei la monu husi lalehan mai bainhira ita la asegura sistema serbisu di’ak, etapa serbisu ne’ebé los no mós halo supervizaun rotina.

Kompañia ho konsultór tenki serbisu ho domin, ita mesak timoroan de’it favor hatudu saida mak ita bele hodi fó onra ba eroi sira ne’ebé mak mate ba rai ne’e no ita buka meius hotu-hotu hodi halo povu kontente ho infraestrutura sira ne’ebé Estadu harii.

Marka prezensa mós iha lansamentu ne’e Ministru Obras Públika, Ministru Planu Ordenamentu, Deputadu Komisaun A-PN, Deputadu Komisaun E-PN, PDHJ, IJE, KAK, CNA, SGP, CAFI, no media.