Loron, 20 Fevereiru 2023-Ajénsia Dezenvolvimentu Nasionál Institutu Públiku (ADN, I.P.) liu husi Xefe Departamentu Laboratóriu Eng. Jony R. Varela ho tékniku sira hala’o enkontru ho JICA iha sala enkontru Laboratóriu ADN, I.P. Fatuhada hodi ko’alia kona-ba rezultadu treinamentu online ne’ebé Eng. Jony R. Varela frekuenta durante fulan 2 iha tinan kotuk.

Enkontru ne’e atu introdús fila fali kona-ba treinamentu online enjeñeiru ne’e tuir durante fulan rua iha Setembru to’o Novembru 2022 hodi aumenta ninia koñesimentu kona-ba área tékniku nian hodi aplika iha instituisaun ida ne’e. Matéria ne’ebé nia aprende durante ne’e mak ko'alia kona-ba lala’ok infraestrutura, safety, vida util iha konstrusaun, manutensaun ba ponte, environment/ambiente no seluk tán ne’ebé relasaun ho konstrusaun no manutensaun nian.

Enkuantu husi parte JICA apresia ho aprezentasaun no interesante tebes ba sira tanba ne’e husu atu transfere mós esperiénsia ne’ebé nia hetan durante formasaun ba kolega sira seluk. Aleinde ne’e mós husi JICA nia parte kontinua apoiu no husu mós atu enjeñeiru ADN atu prepara proposta no propoen kona-ba kontinuasaun ba formasaun sira relevante ne’ebé relevanete ho área tékniku nian hodi eleva liu tan sira nia koñesimentu.