GOVERNU TIMOR-LESTE REALIZA SEMINÁRIU NASIONÁL REFLESAUN TINAN 20 DEZENVOLVIMENTU INFRAESTRUTURA

Díli, 21 Marsu 2023 - Konsellu Administrasaun Fundu Infraestrutura (sigla-portugés CAFI) realiza Semináriu Nasionál kona-ba Infraestrutura nian ho tema “Reflesaun Tinan 20 Dezenvolvimentu Infraestrutura iha Timor-Leste: Kualidade Reziliénsia no Sustentabilidade” iha salaun Auditóriu Kay Rala Xanana Gusmão, Ministériu Finansas, Aitarak Laran.

Inisiativa ba realizasaun semináriu ne’e husi membru CAFI nian ne’ebé kompostu husi Ministériu Planu no Orenamentu (MPO), Ministériu Obras Públiaks (MOP), Ministériu Transportes no Komunikasoins (sigla-portugés MTC), Ministériu Finansas (MF) inklui mós instituisaun sira ne’ebé tutela hanesan Secretariado dos Grandes Projetos (SGP), Ajénsia Dezenvolvimentu Nasionál, Institutu Públiku (ADN,I.P.).

Semináriu ne’ebé realiza durante loron tolu hahú husi 21-23 Marsu, Vise Primeiru Ministru no Ministru Planu no Ordenamentu Eng. Jose Maria dos Reis iha intervensaun dahuluk hato’o kona-ba Panorama atuál Setór Infraestruturas.

Aleinde ne’e Primeiru-Ministru Taur Matan Ruak hato’o mós iha ninia intervesaun katak presiza halo reflesaun ida kle’an iha setór infraestrutura ninian no nesesita hadi’a fallansu sira hodi hasa’e di’ak liu kualidade infraestrutura ida ne’ebé reziliente tuir karakterístika territoriál, nesesidade populasaun no atividade ekonómika sira, atu promove jestaun ida efisiente no efikaz ba rekrusu ezistente sira no atu hadi’a dezempeñu iha setór infraestruturas ne’e rasik.

Partisipa mós iha sesaun loron dahuluk husi Eis Primeiru-Ministru, Dr. Mari Alkatiri hodi hato’o mós intervensaun realtiva ho tema seminariu ninian inklui mós Reprezentante Banku Mundial iha Timor-Leste, Sr. Bernard Harborne.

Hafoin abertura oradór sira kontinua halo aprezentasaun tuir tema ne’ebé preparado husi kada oradór hodi halo reflesauun liga ho tema refere.

Aprezentasaun dahuluk husi Xefi Reprezentativu Agência de Cooperação Internacional do Japão, iha Timor-Leste, Sr. Ito Mimpei, kona-ba Revizaun tinan 20 JICA nia Kooperasaun Infraestrutura iha Timor-Leste/Review of JICA’s 20 years Cooperation of the Infrastructure in Timor-Leste, Diretór Banku Dezenvolvimentu Aziátiku, iha Timor-Leste, Sr. Takeshi Fukayama kona-ba ADB Project Portfolio Review and Challenges, Ministru Obras Públias, Eng. Abel Pires, PhD., Aprezenta kona-ba Implementação dos Projetos de Infraestruturas do Setor, husi Ministério das Finanças, Sr. José Abel Aprezenta kona-ba Finansiamentu Infraestrutura, enkuantu husi Secretariado dos Grandes Projetos, Sra. Odete G. V. da Costa aprezenta Panorama, Desafios e Recomendações do Fundo das Infraestruturas: 2011-2023, Agência de Desenvolvimento Nacional, I.P., Eng. Mariano Renato M. da Cruz kona-ba Papel da ADN no Controlo e Qualidade das Infraestruturas no Comissão Nacional de Aprovisionamento. I.P. Sr. Hermingardo Albano Soares Aprezenta ikus kona-ba Procedimentos de Aprovisionamento.

Marka prezensaun iha eventu nasionál ne’e membru governu balun parseiru dezenvolvimentu, oradór internasionál, nasionál Diretóres Jerál no Nasionál no media sira.