DIRETÓR EZEKUTIVU ADN.IP HALO APREZENTASAUN SISTEMA BA S.E VICE PRIMEIRO MINISTRO

Dili, 05 Setembru 2023- Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Eng Mariano Renato Monteiro da Cruz hamutuk ho ekipa tékniku sira hala’o sorumutu ho Sua Exelensia Vise Primeiru Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Eng. Mariano Asanami Sabino hodi halo aprezentasaun sistema iha Palacio do Governo.

Iha okaziaun ne’e Diretor Ezekutivu aprezenta sistema hirak ne’ebe durante ne’e ADN, IP utiliza hodi fasilita halo kontrolu ba servisu loron-loron nian liu-liu parte verifikasaun ba dokumentu sira ne’ebé liña Ministeriais no entidade sira submete ba ADN hodi halo verifikasaun ba dezeñu, BoQ no espesifikasaun tékniku sira ne’ebé mak ekipa tekniku sira devolve ka verifika inklui mós halo kontrolu ba atividade inspesaun iha terenu.

Aleinde ne’e, S.E Vice Primeiro Ministro mos fo apresiasaun no louva ba sistema servisu ne’ebe mak durante ne’e ADN, IP utiliza tanba sistema refere bele ajuda lalaok servisu iha ADN, IP laran no oinsa ADN, IP rasik bele kontrola servisu liu husi sistema refere.

Sistema ne’ebe dadaun ne’e ADN, IP utiliza mak hanesan; sistema LMS (Letter management System) hanesan sistema ida ne’ebe utiliza ba karta Tama no Sai, Sistema PMIS (Project Management Information System) hanesan sitema Project ne’ebé ADN dezenvolve no implementa hodi halo kontrolu ba serbisu insitutuisaun ninian hodi kontrola projetu sira iha Timor laran tomak, sistema GIS (Geographical Information System) sistema ida ne’ebe utiliza ba informasaun no lokalizasaun Projetu. Iha mos sistema seluk tan mak hanesan sistema Agendamento, sistema ida ne’ebe utiliza atu haree liu-liu ba agenda Diretor Ezekutivu nian, sistema HRMS (Human Resource Management System) sistema ida ne’ebe utiliza ba funcionario sira, hanesan profile kada funcionario, avaliasaun servisu, lisensa annual no seluk-seluk tan.