Díli, loron 9 Outubro 2023-Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Sr. Rui Lourenço da Costa hamutuk ho Adjuntu Eng. Januario M. Guterres no koordenadór sira no mós funsionáriu ADN tomak hala’o enkontru iha salaun enkontru ADN,IP.

Reuniaun ne’e lidera husi Diretor Ezekutivu ho objetivu atu rona funsionáriu sira nia preokupasaun liuliu enjeñeiru hirak ne’ebé destaka iha munisípiu kona-ba sira nia obstákulu no mós dezafiu hotu ne’ebé sira enfrenta durante hala’o servisu iha terenu liga ho atividade inspesaun no pagamentu ba projetu sira ne’ebé implementa.

Durante reuniaun, enjeñeiru no mós non enjeñeiru hato’o sira nia preokupasaun no problema balu ne’ebé sei menus hanesan fasilidade servisu, liuliu transporte tanba bazeia ba kuantidade projetu ne’ebé barak no mós distánsia husi munisípiu to’o Postu sira dook, nune’e sira rekomenda ba nivel superiór sira atu bele tau matan ba asuntu sira ne'ebé mensiona. Aleinde ne’e sira mós husu atu fó formasaun ba sira liuliu kona-ba parte tékniku nian atu nune’e fasilita enjeñeiru sira hodi kontrola projetu liu husi inspesaun no verifika dokumentus sira hodi garantia nafatin kualidade projetu ne’ebé implementa. Aleinde ne'e, sira mós sujere atu hadi’a sistema servisu ne’ebé seidauk másimu iha instituisaun.

Hatán ba preokupasaun husi tékniku sira nian mak Diretor Ezekutivu toma nota no sei halo diskusaun iha nivel management hodi buka solusaun ba kestaun hirak ne’ebé levanta ona. Nia apresia ho mudansa lubuk ida ne’ebé iha, liu husi Diretor Ezekutivu Sesante Eng. Mariano Renato Monteiro da Cruz nia lideransa no sei kontinua hadi’a di'ak liu tan buat balun ne’ebé seidauk másimu liuliu liga ho tékniku sira nia preokupasaun ne’ebé hato’o ona iha meza.

Diretór Ezekutivu mós hatutan sei responsabiliza tomak hodi kontrola másimu ba funsionamentu instituisaun ADN.IP nian. Nune’e nia husu ba parte hotu-hotu atu kolabora di’ak nafatin iha instituisaun hodi serví no kontribui ba dezenvolvimentu liuliu iha área infraestrutura nian iha rai ida ne’e.