Kriasaun ba Ajénsia Dezenvolvimentu Nasionál, IP (ADN, I.P) bazeia ba iha Dekretu Lei Nú. 11/2011 23 Marsu hafoin ne’e transforma ba Instituisaun Públiku bazeia ba Dekretu Lei Nú. 60/2020 25 Novembru.

ADN, IP núdar Instituisaun Públiku ne’ebé tutela mós ba iha Ministériu MPIE ho nune’e mak Diretór Ezekutivu ADN, IP hetan mós oportunidade hodi halo aprezentasaun ne’ebé foku liu ba iha Knar ADN, IP iha verifikasaun no inspesaun Projetu (Kontrolu Kualidade). Pontus importantes ne’ebé mak aprezenta husi D.E ADN, IP mak hanesan; Baze Legál no Papel ADN, IP, Metas iha Programa IX Governu nian ba seitór Infraestrutura, Konseitu Kontrolu Kualidade, Politika ka Prosedimentu servisu kontrolu kualidade, Dezafius no difikuldades no misaun ADN, IP nian ba futuru.

Entertantu Seminariu Nasionál ida ne’e rasik loke husi Primeiru Ministru RDTL, S.E. Kay Rala Xanana Gusmão, iha nia diskursu, Primeiru Ministru husu ba partisipantes sira ne’ebé maka marka prezensa no partisipa iha seminariu ida ne’e atu nune’e bele koalia no koalia ho laran tomak.

“hau husu tebes bai mi hotu, Timor oan sira, atu bainhira partisipa iha ne’e, iha dialogu ida ne’e, koalia ho laran tomak,ita la mai buka vitima, ita la mai atu akuza se deit, ita mai atu haree tok, se ita iha idea di’ak ida, iha planu di’ak ida atu halo ba ita nia rain ne’e lato’o, se ita tuir regras prosidementus.” Hatete Primeiru Ministru Kay Rala Xanana Gusmão iha nia diskursu.

Primeiru Ministru iha nia diskursu ne’e kontinua husu ba partisipantes sira atu partisipa iha seminariu ne’e ho di’ak, partisipa ho ulun, no la’os halo kritika deit, Primeiru Ministru reforsa liu tan katak mai partisipa iha seminariu ne’e atu hasai lisaun hodi nune’e bele kurijé.

Atu hakotu nia intervensaun iha sesaun abertura ba seminariu nasionál ida ne’e, Primeiru Ministru RDTL S.E. Kay Rala Xanana Gusmão reforsa liu tan katak, Governu mai ho komprimisu atu servi Rai ida ne’e, servi povu ida ne’e, PM hatete mós katak, Governu la’os Ministeriu deit maibé ita hotu tun to’o kraik, atu hamutuk ho komprimisu ida ne’e.

Oportunidade hanesan, Ministru Planeamentu Investimentu Estratéjiku (MPIE) S.E. Eng. Gastão Francisco de Sousa iha nia diskursu hato’o katak Semináriu ida ne'e núdar okaziaun importante ida hodi nune’e bele haree hikas ba lisoens aprendidas iha dezenvolvimentu infraestruktura iha ita nia rain.

Semináriu ida ne'e núdar okaziaun importante ida ba ita hotu atu haree fali ba lições aprendidas iha dezenvolvimentu infraestruktura iha ita nia rain hodi foka ba nia kualidade, dezafiu sira mak inferenta no buka atu oferese solusões no navigasaun ba oportunidade sira hodi hadia di’ak liu tan iha futuru, tamba ne’e importante tebes atu entidade relevantes sira mak kaer papel iha seitor infraestruktura koñese no familiariza-an ho regra no prosedimentu sira iha setór infraestrutura hodi garante kualidade no asegura transparénsia, atu bele promove kreximentu ekonómiku no asegura moris-di'ak ba sidadaun  hotu. Hateten Ministru MPIE S.E. Eng Gastão Francisco de Sousa iha nia diskursu abertura Seminariu Nasionál ne’e.

Ministru MPIE S.E. Eng Gastão Francisco de Sousa molok hakotu nia diskursu iha oportunidade ne’e, kontinua enkoraza atu partisipantes sira iha seminariu nasionál ida ne’e atu bele fó tempu máximu iha semináriu ida ne’e hamutuk haree no partilha koñesimentu, matenek, no esperiénsia iha materia regras no prosedimentus iha infraestruktura públiku atu bele lori ita hotu iha hanoin no pajina ne’ebé hanesan, Ministru MPIE hatutan mós katak, saida mak ohin ita hotu rona no partilha ba malu iha fatin ida ne’e sei sai nudar referénsia ou bukae iha ita nia servisu loron-loron nian liu-liu wainhira tama ba iha  faze implementasaun projeitus públikus sira.

Semináriu nasionál ida ne’e rasik nia objetivu mak atu promove programa IX governu  iha seitór infra-estrutura liuhusi diskusaun entre governu no parseirus dezenvolvimentu no entidade relevantes foka ba kualidade, dezafiu no solusaun sira iha dezenvolvimentu infra-estrutura.

Partisipantes sira iha Seminariu Nasionál ida ne’e mak membru governu, membru Parlamentu Nasionál, parseiru internasionál, Autoridade Munisipál, Sosiedade Sivil no mós Akadémiku sira. (Media_ADN)