Bazeia ba despassu husi Primeiru Ministru nú. 16/GPM/II/2024, 28 de fevereiru. Primeiru Ministru nomeia Sr.Gregório Da Cunha Saldanha "Mouris" hodi asume kargu núdar Prezidente Autoridade Munisipiu Díli.

Iha nia diskursu hafoin simu tomada pose núdar PAMD, hato’o katak knar ne’ebé mak atribui ba nia ne’e núdar knar ne’ebé mak todan.

“Ha’u ohin simu kargu todan ida hanesan, Prezidente Autoridade Munisipal Díli, iha sidade ida kompleksu tebes ho problema oin-oin. Dalan hanesan kapitál no odamatan boot ba Timor-Leste presiza halo mudansa ba área tuir kompetensia ne’ebé mak atribui. Hateten PAMD iha nia diskursu.

Prezidente Autoridade Munisipal Díli hatutan mós katak sei servisu maka’as no hamutuk ho funsionariu sira hotu iha autoridade munisipiu Dili hodi halo koordenasaun servisu ho autoridade sira hotu tantu iha postu administrative, suku to’o ba aldeia.

“Ami sei servisu maka’as hamutuk ho funsionáriu tomak iha autoridade munisípiu Díli hodi halo kordenasaun servisu ho autoridade sira iha postu, suku to’o aldeia, autoridade governmentál no naun-governmentál ho objetivu hodi buka soluasaun ba problema sira nune’e dezenvolvementu nasionál bele la’o lalais no loloos, iha kapitál ida hakmatek no moos, furak no fatin ba moris di’ak.” Katak PAMD durante nia diskursu.