Dili, 30/10/2024. Adjuntu Diretór Ezekutivu ADN Eng. Januario M. Guterres akompaña mós husi Assesr Tékniku ADN, iha tersa-feira semana ne’e, partisipa iha serimonia tomada pose ba Prezidente Konsellu Administrasaun  no mós Komisaun Ezekutivu BTL,E.P Foun. Serimonia ida ne’e rasik realiza iha Salaun CNE Kaikoli Dili.

Xefi Governu nomeia Sr. Gustavo da Cruz sai núdar Prezidente no Sr. José Filipe núdar Vice-Prezidente foun hodi subtitui Prezidente BTL,E.P sesante Sr. Carlos Peloi hodi lidera BTL,E.P ba mandate durante tinan haat (4).

Prezidente BTL,E.P Sr. Gustavo da Cruz hatete katak nia simu pose ida ne’e la’os oportunidade maibé responsabilidade maka atu tau prioridade ba programa ne’ebé BTL,E.P iha, reorganiza BTL,E.P hodi fo resposta ba komunidade nia preokupasaun kona-ba bee moos.

Primeiru Ministru RDTL S.E Kay Rala Xanana Gusmão iha oportunidade ne’e kongratula mós ba Prezidente foun BTL,E.P no nia Vice Prezidente ba komfiansa ne’ebé maka atribui ba sira nain rua, Primeiru Ministru husu atu servisu ho responsabilidade ho fuan no laran hodi tau interese povu nian no jere mós ho di’ak hodi nune’e fornese bee moos ba komunidade iha teritoriu laran tomak atu nune’e komunidade sei la sosa tan ona bee moos husi kompaña sira ne’ebé maka faan bee moos. (Media_ADN)