Dili,14/10/2024. Dezenvolvimentu ka kapasitasaun Rekursu umanu maka esforsu ka meus  ida atu hadi'a kapasidade Rekursu umanu  nian hodi  nune'e bele hasa'e produtividade instituisaun nian. Ho kapasidade rekursu umanu sira iha instituisaun nia laran, sei influensia maka'as hasa'e produtividade serbisu iha instituisaun nia laran.

Rekursu umanu hanesan buat ida ne'ebé importante tebes no la-bele haketak husi organizasaun ida, tantu institusionál ka empreza. Rekursu umanu mós sai hanesan xave ne'ebé determina dezenvolvimentu instituisaun ida nian. Iha nia esénsia, rekursu umanu maka ema sira ne'ebé maka serbisu iha organizasaun ida hanesan movimentadór, pensadór no planeadór sira atu atinji organizasaun nia objetivu sira.

Rekursu umanu importante teb-tebes ba instituisaun ida, no kapasitasaun ba rekursu umanu mós sai importante liu tan hodi nune’e bele hasa’e no aumenta abilidade rekursu umanu nian hodi nune’e bele responde ba nesesidade intituisaun nian liliu iha tempu globalizasaun ida ne’e.

Haree ba importansi ne’ebé sita iha leten, ho nune’e ADN,I.P kontinua haruka nia tékniku sira ba partisipa formasaun iha nasaun Indonézia hodi nune’e bele aumenta liu tan sira nia koñesimentu no abilidade. Área formasaun ne’ebé maka tékniku sira husi ADN ba tuir maka hanesan; teknolojia perfurasaun bee-posu.

Formasaun ida ne’e rasik fornese husi Badan Pengembangan Sumber Daya Manusia Kementerian PUPR-Indonézia nian no formasaun ne’e rasik hala’o durante semana rua (2) hahu husi loron 01-12 fulan Outubru tinan 2024 no realiza iha Surabaya Indonézia. Formasaun ne’e akontese bazeia ba akordu ne’ebé maka selebra ona antes ne’e entre Governu Timor Leste no Governu Indonézia iha oportunidade balu liu ba. (Media_ADN)