RAEOA, 19/02/2025. Diretór Ezekutivu ADN Sr. Rui Lourenço da Costa hamutuk ho Assesór no Assesora Tékniku Nasionál ADN nian no mós tékniku ADN destakadu iha RAEOA, akompaña Primeiru Ministru RDTL S.E Kay Rala Xanana Gusmão hodi observa Projetu Emerzénsia ba rehabilitasaun Estrada iha Nunhenu, Taiboco, Postu Oesilo, RAEOA.

Primeiru Ministru RDTL S.E Kay Rala Xanana Gusmão iha nia vizita mai RAEOA aleinde halo lansamentu ba iha Digitalizasaun Sistema Saude ba Sekretaria Saude RAEOA iha loron 18/02/2025 horseik, aproveita mós oportunidade hodi halo observasaun ba projetu emerzénsia rehabilitasaun Estrada iha Nunhenu, Taiboco, Postu Oesilo.

Oportunidade ne'e, Primeiru Ministru hasoru malu mós ho komunidade sira husi Taiboco, Usi-Taco no mós Lamasi hodi ko’alia ho komunidade sira.

Iha nia diskursu, Primeiru Ministru hateten katak, Prezidente Autoridade RAEOA husu atu Primeiru Ministru halo mós vizita ba iha Taiboco hodi haree progresu rehabilitasaun Estrada, tanba ne’e mak Primeiru Ministru mós mai hodi haree, Primeiru Ministru kontenti tanba projetu iha RAEOA hahu la’o ho di’ak tebes no propoion atu nahe deit sumenti (Plump Concrete) tanba daudaun ne’e iha RAEOA movimentasaun transporte la-dun barak ka seidauk barak, no PM haktuir mós katak ho sumenti bele metin liu tan no dura. Primeiru Ministru husu mós atu ponte sira ne’ebé maka sei klo’ot ne’e atu loke halo luan ituan, hadi’a valeta sira no mós halo moru protesaun.

Iha biban ne’e Primeiru Ministru kontinua apela atu osan povu nian gasta ho di’ak, gasta ho responsabilidade, no gasta osan ne’e hodi hatene, buat ne’e ba to’o iha ne’ebé no hodi halo sa-ida.

Ho Estrada ne'ebé maka halo daudaun ne’e, sei fasilitas tebes komunidade sira liu-liu sira iha área rurais ne’e, sira bele ona lori sira nia produtus ba faan, bele asesu ona ba sentru Saúde, bele ba eskola no bele halo ona atividades sira seluk.

Tinan barak ona estrada iha área rurais sira iha RAEOA ho kondisaun ne’ebé maka grave tebes, no difikulta tebes ba komunidade atu hala'o sira nia atividade, durante ne’e mós dezenvolvimentu foku deit iha RAEOA Villa (Pantai Makasar) maibé agora daudaun dezenvolvimentu hahu husi foho maka tun mai, hodi nune’e bele hadi’a povu nia moris. (Media_ADN)