RAEOA, 02/04/2025. Diretór Ezekutivu ADN Sr. Rui Lourenço da Costa akompaña husi ekipa tékniku ADN destakadu iha RAEOA partisipa iha serimonia asina kontratu entre Prezidente Autoridade RAEOA Sr. Rogério Tiago Lobato ho kompaña sira ne’ebé maka implementa projetu rehabilitasaun Estrada sira iha foho iha RAEOA. Serimonia Asina kontratu ne’e rasik realiza iha salaun enkontru IADE RAEOA.

Prezidente Autoridade RAEOA Sr. Rogério Tiago Lobato iha nia intervensaun hato’o agradese ba iha XI Governu Konstitusionál ne’ebé maka Lidera husi Maun Boot Kay Rala Xanana Gusmão liu husi programa sira ne’ebé iha hodi nune’e implementa Politika Dezenvolvimentu iha RAEOA.

Ema numeru primeiru iha RAEOA ne’e haktuir mós katak iha fulan kotuk ba defende orsamentu RAEOA nian no husu osan barak maibé la-hetan buat ne’ebé hakarak tanba Primeiru Ministru dehan katak primeiru tengki konsentra, atensaun tomak atu hadi’a Estrada iha foho. Hateten Prezidente Autoridade iha nia diskursu.

Nia hatutan mós katak, RAEOA husu buat barak iha edukasaun nian, atu halo eskola, atu halo buat ida ne’e ida ne’eba lae, Primeiru tengki halo Estrada, se Estrada la-iha kareta la-bele halai ba mai atu tula sasan hodi ba hadi’a eskola, tanba ne’e maka kaer ba liafuan Primeiru Ministru nian hodi nune’e lansa programa rehabilitasaun ba Estrada sira ne’ebé iha foho tanba liu ona tinan 20 maka la-halo manutensaun ba Estrada sira, baihira Estrada di’ak ita hasai populasaun Oe-Cusse nian husi Izolamentu, tanba Oe-Cusse ne’e la’os Pantai Makasar de’it, Oe-Cusse ne’e Oesilu, Pasabe,Nitibe no ema barak liu maka hela iha foho,no ema barak liu maki ha foho la-asesu ba dezenvolvimentu tanba Estrada la-di’ak tanba ne’e maka komesa halo Estrada hateten Prezidente Autoridade iha nia intervensaun durante serimonia asina kontratu ho kompaña implementadór sira.

Rehabilitasaun ba Estrada rurál ne’e rasik balun sei nahe Alkatraun no balun sei nahe de’it ho sumentu tanba haree ba nia volume utilizasaun ka transporte ne’ebé maka uza iha Estrada ne’e sei menus no importante liu maka bele hasai ona populasaun husi izolamentu no bele ona fasilita populasaun sira hodi lori sira nia produtu ba merkadu.

Prezidente Autoridade RAEOA ne’e husu mós ba emprezariu sira ne’ebé maka responsabiliza bai ha rehabilitasaun Estrada sira ne’e atu servisu ho responsabilidade la’os deit atu manan osan lae, maibé servisu ho kualidade.

Iha nia intervensaun ne’e Prezidente Autoridade RAEOA husu mós ba ADN no DRI atu halo fiskalizasaun kontinua hodi bele haree Estrada sira ne’e di’ak duni ga lae, se dehan 50% entaun tengki tun kedas ba tereñu hodi avalia,investiga 50% ne’e loos duni ga Lalos, tanba tuir Prezidente Autoridade RAEOA ne’e katak atu halo pagamentu ba obra entaun tengki tuir buat ne’ebé iha tereñu.

Desizaun ne’ebé maka hola liu husi KAFI I,II no III, RAEOA agora iha KAFI no la’os Prezidente Autoridade mak tun mai nia mehi kalan ne’e di’ak nia to’o mai nia fahe de’it, la’e, ne’e KAFI maka haree kompaña ne’ebé maka iha kapasidade mak intrega, tanba ne’e azudikasaun direita, ita tengki haree sira ne’ebé kapasidade iha ne’e atu kaer, ne’e duni responsabilidade ne’e la’os de’it husi Autoridade sira maibé husi mós parseirus dezenvolvimentu, liliu sira ne’ebé maka iha tereñu no tengki koopera malu hatutan Prezidente Autoridade iha nia intervensaun.

Atu hakotu nia intervensaun, Prezidente Autoridade RAEOA kontinua husu ba emprezariu sira atu servisu di’ak, tanba empreza sira ne’ebé kaer obra rehabilitasaun ne’e maioria Oe-Cusse oan deit.

Iha oportunidade hanesan, Diretór ADN iha nia intervensaun kongratula ba Prezidente Autoridade no estrutura ba servisu sira ne’ebé maka halo ona no grasas ba kooperasaun di’ak no espera katak aspirasaun povu nian, bele dividamente responde lolos atu nune’e bele komprimisus politika sira ne’ebé maka halo, programa sira ne’ebé maka XI Governu Konstitusionál hatúr hela no mós planu sira ne’ebé maka espesifikamente ligadu ho RAEOA ita hotu-hotu bele implementa ho di’ak no ho susesu. 

Diretór Ezekutviu ne’e hatutan mós katak ADN sei kontinua fo apoiu nafatin, no Diretór Ezekutivu ne’e mós fo hanoin nafatin ba kompaña sira no mós ba estruturas RAEOA nian ho esperansa ida katak desizaun ne’ebé maka halo ona katak azusta direita signifika risku iha Governu,nune’e kompaña sira mós tengki kontribui ho dezempeñamentu di’ak, Garante kualidade atu nune’e pagamentu sira bele la’o ho di’ak.

Ezekutivu ADN husu mós ba empreza sira atu kontinua komunika di’ak ho tékniku sira iha DRI no mós husi ADN no husu atu keta haluha tanba projetu ne’e emerjénsia ho nune’e fulan ida dala ida ADN no mós DRI tengki halo monthly Cross meeting ba projetu ida-ida tanba risku iha desizoens azusta direita signifika Governu maka foti risku, risku iha obra sira ne’ebé maka foti desizaun ne’e, atu hotu-hotu bele jere ho di’ak maka tengki iha monthly cross meeting.

Atu hakotu nia intervensaun, Diretór Ezekutivu ADN husu atu hotu-hotu hamutuk asaun ida deit hodi liberta povu ida ne’e husi mukit no ki’ak.

Entertantu kompaña hamutuk 27 maka sei responsabiliza ba rehabilitasaun obra sira iha RAEOA no obra sira ne’ebé sei hetan rehabilitasaun ne’e maka hanesan Projetu rehabilitasaun Estrada hamutuk kompaña 9, kompaña 3 responsabiliza ba rehabilitasaun Edifikasaun no restu responsabiliza ba projetu konstrusaun no rehabilitasaun moru protesaun.

Partisipa iha serimonia asina kontratu ne’e maka Prezidente Autoridade RAEOA, Diretór Ezekutivu ADN ho ekipa, Sekretariu Rezionál sira, Diretór Rezionál sira, Assesor sira no Diretór husi Empreza sira. (Media_ADN)