Dili, 27/06/2025. Agênsia Desenvolvimento Nasionál, I.P., mak organismu husi administrasaun indireta husi Estadu ne’ebé responsável hodi konseber, koordena, ezekuta no avalia polítika ne’ebé defini no aprova husi Konsellu Ministrus kona-ba avaliasaun, jestaun, monitorizasaun no fiskalizasaun projetu kapital dezenvolvimentu.

Haree ba knár importante husi ADN nian hanesan sita iha leten, ho nune’e maka tékniku sira ne’ebé maka daudaun ne’e haknar án iha ADN kontinua hala’o sira nia knar kompetensia ne’ebé maka atribui ba ADN, nune’e maka tékniku sira ne’ebé destaka iha munisipiu sira hotu iha teritoriu Timor Leste kontinua halo monitorizasaun, fiskalizasaun, no mós halo inspesaun ba projetu sira ne’ebé maka implementa hela iha tereñu.

Aktu ne’e it abele haree husi tékniku ADN sira ne’ebé maka destaka iha munisipiu Liquiça ne’ebé maka ba halo inspesaun pagamentu ba projetu rehabilitasaun Estrada rural ne’ebé implementa husi kompaña Aleni Unipesoál Lda iha Vavaquina Maubara, munisipiu Liquiça.

Nune’e mós tékniku ADN sira ne’ebé destaka iha munisipiu Viqueque, sira mós halo monitorizasaun no inspesaun pagamentu ba projetu rehabilitasaun Estrada ne’ebé maka implementa husi kompaña Lutu Tare Unipesoál Lda iha Kraras Viqueque.

Husi fali munisipiu Lautem, tékniku ADN destakadu sira hamutuk ho Supervizór Gatec iha ne’eba halo mós inspesaun ba projetu konstrusaun Igreza Foun Paroquia São Paulo ne’ebé maka implementa husi kompaña Jenic Enterprises Unipesoál Lda no nain ba projetu ida ne’e maka Gabinete Apoiu Sosiedade Sivil, ho montante kontratu $ 2.852. 333.36 ho durasaun kontratu durante tinan rua (2), projetu ida ne’e lokaliza iha Lospalos, munisipiu Lautem Vila.

Tékniku ADN destakadu sira, sei kontinua tau matan nafatin bao bra sira ne’ebé maka implementa iha tereñu hodi asegura obra sira ne’ebé implementa ne’e kontinua la’o tuir duni ninia koridór haktuir ba konkordansia ne’ebé maka iha ona, katak tengki ho kualidade, tuir duni dezeñu ka BoQ ne’ebé maka iha, tuir duni prasu kontratu ne’ebé maka parte sira konkorda ona. (Media_ADN)