Dili, 26/06/2025. Koordenadór UCVQ-ADN Sr. Fransisco X. de Deus Jerónimo akompaña husi Xefi departamentu ITI-ADN Sr. Remigio X. da C. santos no mós tékniku ADN destakadu iha munisipiu Baucau, hala’o enkontru Koordenasaun servisu Mensál ho kompaña sira ne’ebé maka daudaun ne’e implementa hela projetu iha munisipiu Baucau.

Iha enkontru ida ne’e, reprezentante husi kontratór Arquiris Unipesoál Lda ne’ebé maka sosiu ho Mau Coo Construction Lda mai halo aprezentasaun kona-ba progresu servisu,obstaklu no dezafiu sira ADN kabé ba projetu emerzénsia konstrusaun moru protesaun mota Samalari.

Oportunidade hanesan, halo mós enkontru ne’ebé hanesan ho kontratór no kompaña sira ne’ebé maka daudaun ne’e implementa hela projetu rehabilitasaun estrada iha Triloka ba Fatumaka ba Venilale maka hanesan; Golden Way, Glory Enterprise no mós kompaña Jolitoni Unipessoál Lda. Enkontru koordenasaun servisu mensál ida ne’e sei kontinua hikas iha sexta-feira (27/06/2025) ho kompaña ka kontratór sira seluk ne’ebé maka implementa hela projetu iha munisipiu Baucau.

Enkontru koordenasaun servisu fulan-fulan importante tebes no iha ninia benefísiu estratéjiku no operasionál barak ba ADN, ba nain ba proetu no mós ba kompaña ne’ebé implementa projetu.

Razaun prinsipál sira tansá maka enkontru koordenasaun mensál sira nesesáriu, ho enkontru mensál permite ekipa atu avalia dezempeñu iha fulan kotuk. Ida-ne'e inklui mós Alvu atinjimentu, Problema ka obstákulu ne’ebé mosu no mós Ajustamentu sira ba planu serbisu nian.

Ho enkontru koordenasaun servisu sira nune’e bele ajuda unifika informasaun entre parte sira ne’ebé maka envolve iha implementasaun projetu sira, ho enkontru nune’e bele evita mis-komunikasaun no hadi'a kolaborasaun ne’ebé di’ak entre parte sira hotu. (Media_ADN)