RAEOA, 26/06/2025. Ekipa ADN RAEOA, halo inspesaun ba projetu rehabilitasaun Edifisiu Ezistente Unidade Polisia Fronteira (UPF). Projetu ida ne’e Ministériu Interior maka núdar nain no kontratór Hilobadi unipesoál Lda maka núdar implementadór.

Projetu ida ne’e rasik ho montante orsamentu hamutuk $ 52,641.70, hahu implementa iha tinan 2024 liu ba no daudaun ne’e progresu fiziku ba projetu ida ne’e atinze ona 75 %. Projetu ne’e rasik lokaliza iha Cruz, Pasabe RAEOA.

ADN RAEOA, iha oportunidade balu, halo mós monitorizasaun ba projetu konstrusaun foun Kazérna Polisia Nasionál Timor Leste (PNTL) nian ne’ebé maka implementa husi kontratór Sil-Noni Unipesoál Lda no Diresaun Rezionál Infraestrutura (DRI) ka GPA maka núdar nain ba projetu.

Orsamentu ba projetu ida ne’e hamutuk $ 178,052.28 ho durasaun servisu durante fulan 6, daudaun ne’e progresu fiziku atinze ona 10.76%. projetu ne’e lokaliza iha Suku Abani, Sub Reziaun Passabe.

ADN RAEOA monitoriza mós Projetu rehabilitasaun edifisiu rezionál Administrativa Oe-Cusse Ambeno ne’ebé maka daudaun ne’e la’o hela. Projetu ida ne’e DRI/GPA maka núdar dono projetu no kontratór Timor Lorosa’e unipesoál Lda maka núdar implementadór.

Projetu rehabilitasaun ida ne’e ho orsamentu hamutuk $ 163,170.79 ho durasaun kontratu durante fulan 6, daudaun ne’e progresu fiziku atinze ona 16.12%. projetu ida ne’e lokaliza iha Suku Rosa, Sub Reziaun Pante Makasar.

Tékniku ADN sira iha RAEOA ne’e monitoriza mós projetu rehabilitasaun rezidensia rezionál Administrativu Oe-Cusse Ambeno iha ne’ebé DRI/GPA maka núdar nain ba projetu no kontratór Ami Bele Lda maka núdar implementadór.

Orsamentu ba projetu ida ne’e maka $ 164,713.85 ho durasaun kontratu durante fulan 6, daudaun ne’e progresu fiziku atinze ona 14.60%. projetu ida ne’e rasik lokaliza iha Suku Santa Rosa, Sub Reziaun Pante Makasar RAEOA. (Media_ADN)