Dili, 07 /08/2025. Ajénsia Dezenvolvimentu Nasional (ADN) liu husi Diretór Ezekutivu Interinu Eng. Januario Maia Guterres akompaña mós husi Koordenadora UGA Sra. Amelia da Costa, Xefe Departamentu Finansas Sra. Angela M. E. Correia, Assesór UGA Sr. Nelson S. Pinto, Assesór Planeamentu no Monitorizasaun Sr. Luciano da Silva no Assesór Tékniku Sr. Romualdo D. Guterres hamutuk ho Ministériu Planeamentu no Investimentu Estrátejiku (MPIE) ho mós Instituisaun tuteladu sira maka hanesan FDCH, SGP no CNA no ADN rasik, aprezenta proposta planeamentu no Orsamentu tinan 2026 ba Komité Revizaun Orsamentu (KRO), ne’ebé lideradu husi Primeiru Ministru (PM) S.E Kay Rala Xanana Gusmão, no hala'o iha sala Auditoriu Toré Ministeriu Finansas.

Sesaun aprezentasaun loke direita husi S.E Primeiru Ministru Kay Rala Xanana Gusmão nu’udar Prezidente KRO tenik, MPIE mosu atu hare no organiza dezenvolvimentu, nune’e mak hari mós Ajénsia tuteladu sira hodi bele hare ba Dezenvolvimentu. Nune’e mós KRO hanesan oportunidade ida atu ita kuriji ita nia an, ita halo ho fuan ka lae no halo duni ka lae.

Iha aprezentasaun Ajénsia Dezenvolvimentu Nasionál (ADN) mai ho proposta adisionál millaun $1, 564,452 hodi reforsa orsamentu iha kategoria Salariu no Vensimentu $ 540 mil, Bens no Servisus $ 160 mil, Kapital Menor $ 185 mil no Kapital Dezenvolvimentu 679,452 mil ba OJE tinan fiskal 2026. Iha oportunidade ne'e ’e aprezenta mós dezenpeñu ezekusaun Orsamentu Tinan Fiskál 2025 ho taxa ezekusaun ate fulan jullu atinzé ona 50,44%.

Iha oportunidade ne'e Diretor Ezekutivu Interinu ADN, halo mós esklaresimentu kona-ba kna’ar servisu ADN nian kabé ba servisu verifikasaun prévia no inspesaun ba projetus infraestruturas sira. Desde inisiu husi fulan janeiru ate fulan jullu tinan 2025 ADN halo ona verifikasaun ba projetus hamutuk 374 no halo inspesaun ba 1927 projetus on going husi Liñas Ministerias no setores sira hotu. (Média-ADN)