Dili, 06/08/2025. Diretór Ezekutivu ADN Interiñu Eng. Januario M. Guteres partisipa iha Reuniaun Komite Revizaun Orsamentu Tinan 2026 nian ba loron da-ruak nian ne’ebé maka prezide direita husi Primeiru Ministru RDTL S.E Kay Rala Xanana Gusmão ne’ebé maka hala’o iha Salaun Auditóriu, Torre Ministériu Finansas, Aitarak-Laran.

Iha loron da-ruak nian ne’e, Ministériu Solidaridade Sosiál no Ikluzaun (MSSI) hamutuk ho instituisaun rua (2) ne’ebé tutela ba iha MSSI maka hanesan Institutu Nasionál Seguransa Sosiál (INSS) no mós Sentru Nasionál Rehabilitasaun (SNR) maka halo aprezentasaun proposta Planeamentu no Orsamentu tinan 2026 nian ba iha KRO.

Proposta Planeamentu no Orsamentu tinan 2026 nian husi MSSI ne’e rasik aprezenta direita husi Ministra MSSI S.E Verónica da Dores ne’ebé maka akompaña mós husi Vice Ministra MSSI S.E Céu Brites no mós Kargus Xefia sira husi Instituisaun Tuteladu sira.

Iha oportunidade ida ne’e ekipa sira husi INSS no mós husi SNR halo mós aprezentasaun proposta Planeamentu no Orsamentu tinan 2026 nian ba iha KRO.

Termina aprezentasaun husi MSSI, kontinua hikas ho aprezentasaun proposta Planeamentu no Orsamentu tinan 2026 husi Ministériu Assuntu Kombatentes Libertasaun Nasionál (MAKLN) nian ba iha KRO.

proposta Planeamentu no Orsamentu tinan 2026 husi MAKLN nian ne’e rasik aprezenta direita husi Ministru MAKLN S.E Gil da Costa Monteiro Oan-Soru.

Entertantu, tama ba parte loraik nian, oportunidade ba Ministériu Saúde hodi halo aprezentasaun ba iha proposta Planeamentu no Orsamentu tinan 2026 nian ba iha KRO. Aprezentasaun ba proposta Planeamentu no Orsamentu tinan 2026 husi Ministériu Saúde nian ne’e uluk nanain halo husi Ministra Saúde S.E dr. Élia A.A dos Reis Amaral, S.H hafoin ne’e kontinua ho aprezentasaun husi Instituisaun sira ne’ebé maka tutela ba iha Ministériu Saúde maka hanesan; Hospitál Nasionál Guido Valadares, Institutu Nasionál Saúde Publiku Timor-Leste, Institutu Nasionál Farmasia no Produtus Médikus no mós husi Servisu Nasionál Ambulansia no Emerzénsia Medika.

Haktuir ba kalendariu ne’ebé maka iha Reuniaun Komite Revizaun Orsamentu ba tinan 2026 nian ne’e sei kontinua to’o iha loron Sabadu (23/08/2025). (Media_ADN)