Dili, 05/08/2025.Diretór Ezekutivu Interiñu Ajénsia Dezenvolvimentu Nasionál (ADN) Eng. Januario M. Guteres akompaña husi Kargu Xefia sira husi ADN no mós Assesór Administrasaun no Finansas husi ADN nian, partisipa iha reuniaun Komite Revisaun Orsamentu (KRO) ne'ebe maka hala’o iha Salaun Auditóriu, Torre Ministériu Finansas, Aitarak-Laran.

Reuniaun KRO ida ne’e prezide Direita husi Primeiru Ministru RDTL S.E Kay Rala Xanana Gusmão no marka Prezensa mós husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente S.E Francisco Kalbuadi Lay, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária S.E Mariano Assanami Sabino, Ministru Obras Públika S.E Samuel Marçal, Ministru MPIE S.E Gastão Fransisco de Sousa, Ministra Finansas S.E Santina José Rodrigues F. Viegas Cardoso no mós Vise Ministra Finansas S.E Felicia Claudinanda Cruz Carvalho.

Prezénsa Ajénsia Dezenvolvimentu Nasionál (ADN) nia iha Reuniaun Komite Revizaun Orsamentu (KRO) hahú husi loron 05 Augostu ba oin núdar observadór hodi toma nota kona-ba orsamentu ba projetu sira iha Kapitál Dezenvolvimentu, hafoin ne’e hafoin ne’e iha dia 07/08/2025 maka ADN hamutuk ho instituisaun sira ne’ebé maka tutela ba iha Ministeriu Planeamentu Investimentu no Estratéjiku (MPIE) sei halo mós aprezentasaun iha Komite Revizasaun Orsamentu (KRO).

Reuniaun Komisaun Revizaun Orsamentu (KRO) ba loron da-uluk nian (05/08/2025) hahu ho Ministeriu tolu (3) maka hanesan Ministeriu Edukasaun ne’ebé maka aprezenta direita husi Ministra Edukasaun S.E Dulce de Jesus Soares ne’ebé akompaña mós husi Sekretariu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos.

Iha diskusaun ne’e haree liu bá númeru professores, númeru alunus, kondisaun eskola sira, inklui haree mós ezekusaun Orsamentu Jerál Estadu (OJE) tinan 2025, ne’ebé Ministériu ne’e iha nune’e KRO bele haree, tetu no deside.

Termina tiha aprezentasaun husi Ministeriu Edukasaun, kontinua hikas ho aprezentasaun husi Ministeriu Juventude,Desportu, Arte no Kultura MJDAC-Sigla Portugés) ne’ebé maka lidera husi Ministru MJDAC S.E Nelyo Isaac Sarmento ne’ebé maka akompaña husi Sekretáriu Estadu bá Arte no Kultura, S.E Jorge Soares Cristovão no mós ekipa.

Tama ba parte loraik nian kontinua ho aprezentasaun husi Ministeriu Ensiñu Superior Siensia no Kultura (MESCC-Sigla Portugés). Proposta Planeamentu no Orsamentu tinan 2026 ne’e aprezenta direta hosi Ministru Ensinu Superiór, Siénsia no Kultura, S.E José Honório da Costa Pereira Jerónimo.

Alende ne’e, ohin mós KRO assiste aprezentasaun orsamentu hosi Ajénsia no Instituisaun sira ne’ebé tutela bá Ministériu Ensinu Superiór, Siénsia no Kultura.

Instituisaun tutelada sira ne’e mak hanesan Agência Nacional para a Avaliação e Acreditação Académica, Instituto Público (ANAAA,I.P.), Institutu Nasionál Siênsia no Teknolojia (INCT), Universidade Nacional Timor Lorosa’e (UNTL) no Instituto Politékniku Betanu (IPB).

Reuniaun KRO ida ne’e rasik sei hahu hala’o iha loron 05/08/2025 to loron 23/08/2025 ne’ebé maka sei taka ho aprezentasaun husi PM ho nia instituisaun tuteladas no mós husi Ministeriu Finansas ho nia instituisaun tuteladas.

Desizaun finál ba rekorentes, desizaun finál ba orsamentu kapitál sira no desizaun finál ba totál Orsamentu Jerál Estadu 2026 sei foti iha loron 25-29/08/2025. (Media_ADN)