Dili,07/08/2025. Diretór Ezekutivu ADN Interiñu Eng.Januario M.Guteres partisipa iha reuniaun Komite Revizaun Orsamentu (KRO) ba loron da-tolu nian núdar observadór. Reuniaun ida ne’e lidera husi S.E Kay Rala Xanana Gusmão no hala'o iha sala auditorium Ministériu Finansas Aitarak Laran Dili.

Reuniaun Komite Revizaun Orsamentu ba loron da-tolu ida ne’e hahu ho aprezentasaun Planeamentu no Orsamentu tinan 2026 husi Ministériu Transporte no Komunikasaun (MTK) no aprezenta direita husi Ministru MTK S.E Miguel Marques Gonçalves Manetelu.

Hafoin Ministru MTK halo tiha aprezentasaun ba Proposta OJE Ministériu nian, iha oportunidade ne'e instituisaun sira ne’ebé tutela ba iha Ministériu MTK ne’e mós hetan oportunidade hodi halo aprezentasaun ba sira nia proposta. Instituisaun Autonoma hirak ne'ebé tutela ba iha Ministériu MTK ne’e maka hanesan; Autoridade Aviasaun Sivil Timor-Leste, I.P, Autoridade Nasionál Komunikasoes,I.P, Administrasaun Aeroportu no Navegasaun Aérea Timor-Leste, E.P, Ajénsia Teknolojia Informasaun no Komunikasaun, I.P, no Administrasaun Portu Timor-Leste, I.P.

Termina Aprezentasaun husi Ministériu MTK ho Instituisaun Tuteladu sira ba iha KRO,kontinua kedas ho diskusaun relasiona ho Proposta ne’ebé maka aprezenta ona. (Media_ADN)