Dili, 23/09/2025. Koordenadór sira husi Ajénsia Dezenvolvimentu Nasionál (ADN), kompostu husi Koordenadór UCVQ, Koordenadór UAP no Koordenadór UEDC, hamutuk ho ekipa ADN, iha Sabadu (20/09/2025) liu ba, partisipa iha Serimónia Lansamentu hatúr fatuk da-uluk ba konstrusaun Irigasaun Mota Irabere iha Postu Administrativu Uatucarbau, Munisípiu Viqueque.

Obra irigasaun ida ne’e mak objektivu prinsipal hodi aumenta kapasidade agrikultura lokal, fasilita fornesimentu bee ba natar nain, no fó kontribuisaun direita ba seguransa alimentária komunidade.

Konstrusaun irigasaun Mota Irabere sei fó impaktu positivu ba sustenta rendimentu agrikultura, habelar área natar nain balun ne’ebé antes la iha asesu ba bee, no sai hanesan projetu prioridade ba dezenvolvimentu agrikultura iha Munisípiu Viqueque.

Serimónia ba Lansamentu hatúr fatuk da-uluk konstrusaun irigasaun ida ne’e halo husi Ministru Planeamentu Investimentu no Estratéjiku (MPIE) S.E Eng. Gastão Fransisco de Sousa ne’ebé maka iha oportunidade ne'e reprezenta hela Primeiru Ministru S.E Kay Rala Xanana Gusmão no akompaña direita husi Ministru Agrikultura Pekuaria Peskas no Floresta (MAPPF) S.E Marcos da Cruz, ne’ebé partisipa mós husi Membru Governu sira, Membru Parlamentu Nasionál, PAM Viqueque, Autoridade Lokál, no mós komunidade sira.(Média-ADN)