Manatuto, 24/09/2025. Enjeñeiru sira husi Ajénsia Dezenvolvimentu Nasionál (ADN) destakadu iha Munisípiu Manatuto hamutuk ho Enjeñeiru sira husi Laboratóriu ADN no Laboratóriu Nasionál hala’o inspesaun ba projetu konstrusaun Moru Protesaun Cyclope no Groynes Mota Obrato.

Durante inspesaun, ekipa deteta katak kompaña implementadór, LEMIZIOCOSTA Unipesoál LDA, utiliza simenti marka KAITO, ne’ebé seidauk hetan aprovasaun formais husi autoridade relevante.

Ekipa iha tereñu, ne’ebé kompostu husi Enjeñeiru ADN destakadu iha munisipiu Manatuto, Enjeñeiru husi Laboratóriu ADN, Laboratóriu Nasionál, Ekipa husi UIVP-MOP no represéntante kompaña, koordena malu hodi solusiona kestaun refere no ADN orienta kompaña sobu kedas konstrusaun ne’e kuaze 12 metru.

Durante inspesaun, deskobre katak simenti marka KAITO iha Jumbo 15, utiliza ona Jumbo 2. Tan ne’e, ekipa orienta kompaña atu para imediatamenti uza simenti KAITO no truka ho simenti seluk ne’ebé aprova ona husi autoridade kompetente.

Hafoin sobu tiha, ekipa ADN kontinua akompaña iha terenu hodi assegura katak kompaña tula sai kedas simenti KAITO ne’e, atu evita kompaña bele uza nafatin simenti refere depois enjeñeiru sira remata inspesaun.(Media_ADN)