AILEU, 10/11/2025— Primeiru-Ministru (PM) RDTL S.E Kay Rala Xanana Gusmão lansa  projetu rehabilitasaun estrada ne’ebé maka lokaliza iha suku Seloi-kraik liga ba  Suku Tokoluli, postu administrativu Gleno, munisípiu Ermera, atividade ida ne’e rasik realiza iha loron sábadu (08/11) liu ba.

Iha oportunidade ne’e, Xefe Governu husu ba Ajénsia Dezenvolvimentu Nasionál (ADN) atu kontinua hala’o papél importante hodi fiskaliza obra ne’e to’o remata.

Primeiru Ministru mós husu ba parte kompañia atu halo obra ne’e ho di’ak nune’e kontinua hetan fiar husi Governu bele kaer fali obra bo’ot seluk, no  la-bele depende demais bá kompaña internasionál no hatudu katak Timoroan mós bele.

Projetu rehabilitasaun estrada Seloi-Kraik bá Gleno ho nia sesaun Sta. 0+000 – Sta. 18+267.887, supervijiona hosi Ministériu Obras Públikas.

Rebilitasaun ne’e responsabiliza hosi Kompaña nasionál Marabia Lda ho númeru kontratu TENDER/226/MOP – 2024 no orsamentu $14,034,102.63 ho durasaun loron 365.

Serimónia lansamentu ne’e assiste direta husi membru Governu sira, ADN, ekipa tékniku MOP, SGP, Veteranu sira husi munisipiu Aileu, Autoridade lokál sira, estudante, jovens no populasaun.