Aileu, 09/02/2026. Diretór Ezekutivu ADN,I.P Eng. Janiario Maia Guterres akompaña husi Tékniku ADN,I.P destakadu iha munisipiu Aileu, Partisipa iha enkontru Konsellu Konsultivu Munisipál ne’ebé maka lidera husi Prezidente Autoridade Munisipiu Aileu Sr. João Bosco dos Santos. Enkontru ne’e rasik realiza iha sala enkontru Autoridade Munisipál Aileu nian.

Iha enkontru Konsellu Konsultivu Munisipál nian ida ne’e, Diretór Ezekutivu ADN,I.P Eng. Januario Maia Guterres hetan mós oportunidade hodi halo intervensaun relasiona ho prezensa ADN,I.P nian iha enkontru ida ne’e.

Iha nia intervensaun ne’e Diretór Ezekutivu ADN,I.P haktuir katak Governu Sentral iha hanoin ida atu apoiu munisipiu sira ne’ebé maka nia orsamentu ba projetu infraestrutura ne`ebe maka menus.

“ Ba tinan ida ne`e iha Munisipiu Aileu nia OJE ba fundu infraestrutura barak liu ba Edukasaun no Saude, maski nune`e, ami fiar katak sedauk bele rezolve hotu problema infraestrutura kona-ba edukasaun no saude ninian. Tanba ne`e maka iha orientasaun ida hosi PM ba MPIE iha fulan dezembru 2025 katak atu identifika fali kondisaun real infraestrutura edukasaun no saude nian iha munisipiu sira, inklui Aileu.” hateten Diretór Ezekutivu ADN,I.P iha nia Intervensaun.

Diretór Ezekutivu ADN,I.P ne’e hatutan mós Kona-ba prosesu identifikasaun kondisaun real infraestrutura edukasaun no saude nian ne`e se bele karik iha meadu fulan Marsu 2026 ne`e MPIE bele lori ba aprezenta ona iha KAFI hodi nune’e , karik iha fulan Maiu 2026 prosesu identifikasaun kondisaun real infraestrutura edukasaun no saude bele hotu ona.

Iha nia intervensaun ne’e Diretór Ezekutivu ADN hato’o mós Kona-ba postu saude sira ne`ebe maka tama ona ba projetu PDIM nian sei ajusta deit no sei haree liu ba fali suku sira ne`ebé maka sedauk iha postu saude ne’e.

Iha oportunidade ne’e, Diretór Ezekutivu ADN,I.P haktuir mós Kona-ba eskola nian liu-liu ba eskola foun iha area rural nian sei iha pakote ida ba sala de aula, sintina no uma hela ba profesor sira, tanba profesor sira ne`e dala ruma ema hosi fatin seluk maka ba iha ne`eba, Kona-ba eskola tuan sira ne’ebé maka sei falta eletrika, bee no buat sira seluk tan ADN,I.P sei informa ba MOP sira. Aleinde ko’alia kona-ba asuntu Eskola no Postu saúde nian, iha nia intervensaun ne’e Diretór Ezekutivu ADN,I.P ne’e sita mós kona-ba estrada rurál sira iha Aileu.

“ Ami mos sei haree mos estrada rural, Info deit katak hafoin loron 14 .02.26 lansamentu estrada urbana iha Munisipiu Ainaro, ami mos sei mai fali halo lansamentu ba estrada urbana Aileu nian.” hatutan Diretór Ezekutivu ADN,I.P iha nia Intervensaun.

Atu hakotu ninia intervensaun ne’e, Diretór Ezekutivu ADN, konvida nafatin parte hotu iha munisipiu Aileu atu hamutuk hala’o servisu identifikasaun ida ne’e hodi nune’e bele la’o ho susesu.

“ Kona-ba halo   identifikasaun kondisaun real infraestrutura edukasaun no saude iha Munisipiu Aileu nian ne`e, saida maka ADN iha maka ami bele fasilita transporte ba autoridade Aileu nian bele lao hamutuk ho ADN hodi ba halo identifikasaun ba kondisaun real edukasaun no saude iha terenu. “ Hateten Diretór Ezekutivu ADN,I.P

Entertantu, Prezidente Autoridade Munisipiu Aileu iha nia Intervensaun hato’o katak, husi sira nia parte halo ona identifikasaun ba eskola no postu saúde hotu iha postu administrativu 4 husi munisipiu Aileu.

PAM Aileu, iha oportunidade ne'e, fo orientasaun ba ekipa atu aselera, no ekipa husi Munisipiu Aileu tengki koopera hodi finaliza lalais identifikasaun ida ne'e.

“ Antes fim ida ne’e, lista ida ne’e, ita tengki submete ona, ita nia ekipa ne’e mós tengki tun ona ba iha postu sira, ita tengki aselera, husu ba administradór Postu sira, Xefi Suku sira atu koopera no idak-idak haree ninia area ida ne’ebé maka presiza duni eskola, ida ne’ebé maka presiza duni postu saude ne’e hotu hodi nune’e dadus ne’e bele sai lolos. Sira identifika tiha ona eskola no postu saude sira hotu ne’ebé maka iha postu Administrativu 4 husi munisipiu Aileu, agora ami kala lori postu saude 65 no eskola 7 hanesan ne’e maka ba aprezenta iha OJE 2026 nian ne’e, hodi bele realiza iha tinan ida ne’e, kona-na prosesu identifikasaun real infraestrutura edukasaun no saude nian ne’e, ami sei haree liu ba eskola no postu saude sira ne’ebé maka ami sei ba aprezenta ba MPIE.”  Hateten Prezidente Autoridade Munisipiu Aileu.

PAM Aileu, iha oportunidade ne'e, fo orientasaun ba ekipa atu aselera, no ekipa husi Munisipiu Aileu tengki aselera, PAM Aileu husi ba Administrador Postu sira, Xefi Suku sira atu Koopera no idak-idak haree iha ninia area ida ne'ebe maka presiza duni eskola,ida ne'ebe maka presiza duni postu saude ne'e hotu hodi nune'e dadus ne'e bele sai lolos.

Objetivu husi Prezensa ADN,I.P nian iha munisipiu Aileu ne’e rasik maka atu identifika hotu kondisaun sira tuir lista ne’ebé maka simu husi Saúde no Edukasaun, identifika hotu kondisaun eskola ho postu saude sira ne’e, iha Suku sira ne’ebé maka seidauk asesu ba postu saúde hodi nune’e para bele hahu hadi’a ona. Tanba ne’e maka liu husi enkontru ho PAM hafoin prosesu tuir mai maka sei halo identifikasaun hodi nune’e iha tinan ida ne’e no tinan oin mai Governu hahu hadi’a ona infrastrutura sira saúde no edukasaun nian.

Enkontru ida ne’e rasik hahu husi munisipiu Aieu no sei hala’o mós iha munisipiu seluk ho asuntu ne’ebé hanesan, hodi ko’alia liu kona-ba infrastrutura Saude no edukasaun nian, liliu Suku sira ne’ebé maka dook husi sentru saúde ka seidauk iha sentru saúde no mós kondisaun eskola ne’ebé ho kondisaun seidauk di’ak.

Estudante sira presiza eskola ne'ebé seguru no konfortavel. Inan-aman sira presiza postu saúde ne’ebé besik no prontu atu atende. Tanba edukasaun no kuidadu saúde la’ós buat luxu, maibé direitu ema hotu nian.

Se eskola sira desente, labarik sira matenek. Se kuidadu saúde besik, família sira hakmatek. Ida ne'e maka dezenvolvimentu ne'ebé povu sente duni.

Infraestrutura eskolár ne'ebé dignu no fasilidade saúde ne'ebé adekuadu la'ós de'it estrutura fíziku, maibé fundasaun ba nasaun nia futuru. Eskola ne'ebé seguru no konfortavel enkoraja labarik sira atu aprende ho óptimu, enkuantu fasilidade saúde ne'ebé konveniente no ekipadu ho di'ak garante komunidade ne'ebé saudavel no produtivu. Hametin pilar rua ne'e hanesan la'ós de'it hadi'a kualidade moris maibé mós kria jerasaun ne'ebé intelijente, prontu no rezistente atu hasoru dezafiu sira." (Media_ADN)