Dili, 14/04/2026. Ajénsia Dezenvolvimentu Nasionál (ADN, I.P.) hakarak hato’o klarifikasaun ofisiál kona-ba notísia ne’ebé publika ona iha mídia ho titulu “Komisaun C husu Governu ho ADN labele vinga demais prosesu aprovizionamentu sira”.

ADN, I.P. reafirma katak instituisaun ne’e la involve iha prosesu aprovizionamentu tanba área refere la tama iha papél no knaar ADN,I.P nian. ADN, I.P. la iha kompeténsia ka autoridade atu partisipa ka intervén iha prosesu ne’e.

Hanesan instituisaun públika iha Timor-Leste, ADN, I.P. iha responsabilidade prinsipal ba supervizaun, monitorizasaun no sertifikasaun kualidade projetu dezenvolvimentu kapitál. Liu husi knaar sira ne’e, ADN asegura katak infraestrutura sira ne’ebé implementa kumpre regra no padraun tékniku ne’ebé estabelese ona.

Papél no funsaun prinsipál sira ADN, I.P. inklui:

Fiskalizasaun: Monitoriza ezekusaun projetu atu garante kualidade tuir kontratu.

Sertifikasaun: Verifika no sertifika obra molok aseitasaun final, no rekomenda hadi’a ba obra ne’ebé la tuir padraun.

Apoiu Tékniku: Fó asisténsia téknika iha jestaun projetu kapitál.

Intervensaun iha fatin: Tékniku sira halo inspesaun direta atu monitoriza progresu obra.

Harii iha tinan 2011, ADN, I.P. kontinua hala’o nia knaar atu garante kualidade no sustentabilidade infraestrutura iha nasaun.

Ho meus Komunikasaun ida ne’e, ADN, I.P. hakarak asegura ba públiku katak ADN,I.P nia funsaun sira foka de’it ba aspetu tékniku no kualidade obra, no la envolve iha prosesu aprovizionamentu.

Kontaktu ba Mídia:

Ajénsia Dezenvolvimentu Nasionál (ADN, I.P.)

Dili, Timor-Leste

Email: info@adn.tl

Telefóne: (+670) 78403524