Manatuto, 15/06/2026. Ekipa tékniku ADN destakadu iha Munisípiu Manatuto akompaña Sua Exelénsia Ministru Administrasaun Estatal Tomás do Rosário Cabral halo vizita servisu ba projetu sira ne'ebé atualmente implementa hela iha Munisípiu Manatuto.

Vizita ne'e realiza atu haree diretamente progresu obra sira iha tereñu, avalia kualidade implementasaun no asegura katak servisu konstrusaun sira la'o tuir espesifikasaun téknika, planu servisu no prazu ne'ebé estabelese ona iha kontratu.

Durante vizita, Ministru Administrasaun Estatal halo observasaun ba atividade konstrusaun sira no fó orientasaun ba parte relevante sira atu kontinua garante kualidade, transparénsia no responsabilidade iha implementasaun projetu públiku sira.

Ekipa ADN Manatuto nafatin desempeña nia knaar hanesan entidade fiskalizadora no apoiu tékniku, hodi asegura katak projetu sira ne'ebé finansiadu husi Estadu bele fó rezultadu di'ak no benefísiu direta ba komunidade.

Vizita refere mós sai oportunidade ida atu reforsa koordinasaun entre governu sentral, autoridade lokal, ADN no emprezariu sira, hodi garante dezenvolvimentu infraestrutura ne'ebé sustenta kresimentu ekonómiku no bem-estar komunidade iha Munisípiu Manatuto.(Média-ADN)