Dili, 27 Jullu 2026 – Diretór Ezekutivu Ajénsia Dezenvolvimentu Nasionál (ADN, I.P.), Eng. Januário M. Guterres, hamutuk ho Tékniku Superiór ADN sira, partisipa iha Serimónia Inagurasaun Edifísiu Foun Ajénsia Notísia Tatoli, iha Farol, Dili.

Serimónia ofisiál ne'e lidera diretamente husi Sua Excelénsia Primeiru-Ministru RDTL, Kay Rala Xanana Gusmão, ne'ebé akompaña husi Ministru Planeamentu no Investimentu Estratéjiku (MPIE), S.E. Eng. Gastão Francisco de Sousa, Sekretáriu Estadu Komunikasaun Sosiál, S.E. Expedito Dias Ximenes, Deputada Cedelizia Faria dos Santos, Prezidente Tatoli, reprezentante korpu diplomátiku, instituisaun Estadu, parseiru dezenvolvimentu no konvidadu sira seluk.

Iha nia diskursu, Primeiru-Ministru Kay Rala Xanana Gusmão hato'o parabéns ba Tatoli ba ninia aniversáriu ba dala 10 no inagurasaun edifísiu foun. Nia enkoraja Tatoli atu kontinua sai fonte informasaun ofisiál ne'ebé profesional, independente no kredível, hodi garante katak povu simu informasaun ne'ebé loloos, lalais no responsavel. Primeiru-Ministru mos enfatiza importánsia jornalizmu ne'ebé bazeia ba faktu, investigasaun no étika profissional atu hametin demokrasia no transparénsia iha Timor-Leste.

Prezidente Tatoli, iha nia intervensaun, hato'o agradese ba Governu, parseiru dezenvolvimentu no parte hotu ne'ebé kontribui ba konstrusaun edifísiu foun ne'e. Nia reafirma komitmentu Tatoli atu kontinua hadi'a kualidade servisu jornalístiku, moderniza sistema produsaun notísia no garante divulgasaun informasaun ofisiál ne'ebé objetivu, kredível no asesível ba públiku.

Edifísiu foun Tatoli marka etapa importante ida ba dezenvolvimentu setor komunikasaun no mídia iha Timor-Leste. Infraestrutura moderna ida-ne'e sei aumenta kapasidade servisu jornalista sira no hadi'a efisiénsia diseminasaun informasaun ba komunidade.

Partisipasaun Ajénsia Dezenvolvimentu Nasionál (ADN, I.P.) iha serimónia ida-ne'e reflete komitmentu instituisaun atu kontinua apoia dezenvolvimentu infraestrutura públika no hametin kooperasaun entre instituisaun Estadu sira hodi promove dezenvolvimentu nasionál ne'ebé sustentável.