Venilale, 25 Jullu 2026 – Diretór Ezekutivu Ajénsia Dezenvolvimentu Nasionál (ADN, I.P.), Enj. Januario Maia Guterres, hamutuk ho ekipa tékniku ADN, I.P., partisipa iha Seremónia Lansamentu Fatuk Dahuluk ba Projetu Reabilitasaun Estrada Urbana no Fornesimentu Bee-Moos iha Postu Administrativu Venilale, Munisípiu Baucau.

Seremónia ofisiál ne'e diriji hosi Primeiru Ministru, Kay Rala Xanana Gusmão, no hetan akompañamentu hosi Ministru Obras Públika, Samuel Marçal, autoridade munisipál, lideransa lokal, reprezentante instituisaun Governu no parseiru relevante sira.

Iha nia diskursu, Primeiru Ministru Kay Rala Xanana Gusmão hateten katak atividade lansamentu ne'e la'ós deit atu kumpri ezijénsia dezenvolvimentu, maibé mos nu'udar forma ida atu respeita no valoriza sakrifísiu ferik no katuas sira ne'ebé luta ba independénsia Timor-Leste.

Primeiru Ministru hatutan katak jerasaun foun tenki kontinua hanoin no respeita sakrifísiu veteranu sira liuhosi estudu no serbisu ho responsabilidade, atu bele kontinua dezenvolve nasaun. Nia enfatiza katak serbisu la'ós atu buka deit rendimentu, maibé liuliu atu fó servisu di'ak ba povu no kontribui ba dezenvolvimentu rai ida-ne'e.

Iha oportunidade hanesan, Ministru Obras Públika, Samuel Marçal, dehan katak estrada no bee-mos mak infraestrutura bazika no fundamental ne'ebé sei sai aliserse importante atu acelera dezenvolvimentu iha setor sira seluk, hodi hasa'e asesu ba servisu públiku no melhora moris komunidade sira.

Prezidente Autoridade Munisipál (PAM) Baucau, Veneranda Eurico Lemos Martins, ne'ebé ko'alia nudar reprezentante komunidade Venilale, hato'o nia agradese ba Governu sentral tanba kontinua investe iha infraestrutura públika iha munisípiu. Nia dehan, "Maski neneik, maibé beibeik; tanba ne'e ita hotu tenki hametin unidade no estabilidade atu dezenvolve rai ida-ne'e."

Projetu reabilitasaun estrada urbana no fornesimentu bee-moos iha Venilale ne'e espera bele hasa'e asesibilidade, fasilita mobilidade komunidade, no aumenta asesu ba bee-moos ba populasaun, nune'e suporta dezenvolvimentu ekonomia no bem-estar sosial iha Postu Administrativu Venilale.

Ajénsia Dezenvolvimentu Nasionál (ADN, I.P.) kontinua hala'o nia knaar atu garante projetu infraestrutura estratéjika Governu sira implementa tuir padraun tékniku, qualidade no prazu ne'ebé determina, hodi asegura benefísiu sustentável ba povu Timor-Leste.