Díli, 24/07/2026. Ajénsia Dezenvolvimentu Nasionál, I.P. (ADN) remata formasaun téknika integrada ba Enjeñeiru Munisipál, RAEOA no Ataúro ho tema “Jestaun Siklu Projetu Eskala Ki'ik Bazeia ba Padraun no Prosedimentu Tékniku ADN, I.P.”, ne'ebé hala'o durante loron rua (23–24 Jullu 2026) iha Salaun Delta Nova, Comoro, Díli.

Formasaun ne'e organiza hodi hasa'e kapasidade téknika rekursu umanu iha Munisipiu sira, atu planeia, implementa, monitoriza no halo kontrolu kualidade ba projetu infraestrutura sira liu-liu Programa Dezenvolvimentu Integradu Munisipál (PDIM) no Programa Nasionál Dezenvolvimentu Suku (PNDS), tuir padraun no prosedimentu tékniku ADN.

Iha serimónia abertura, S.E. Primeiru Ministru Kay Rala Xanana Gusmão husu ba Enjeñeiru Munisipál sira atu aproveita formasaun ida-ne'e ho didi'ak atu haforsa kapasidade profisionál no kontribui ba dezenvolvimentu governasaun lokál ida-ne'ebé forte, efisiente no responsivu ba nesesidade komunidade sira. Primeiru Ministru enfatiza katak kapasidade téknika rekursu umanu nu'udar fatór importante atu garante projetu Governu sira bele fó benefísiu loloos ba povu. 

Ministru Planeamentu no Investimentu Estratéjiku (MPIE), S.E. Gastão Francisco de Sousa, hateten katak investimentu ba infraestrutura tenke lao hamutuk ho dezenvolvimentu rekursu umanu. Tuir nia, kapasidade téknika Enjeñeiru sira presiza kontinua fortalece atu projetu dezenvolvimentu hotu bele implementa tuir padraun tékniku apropriadu, garante kualidade konstrusaun no uza orsamentu Estadu ho responsabilidade. 

Iha oportunidade hanesan, Diretór Ezekutivu ADN, Eng. Januário Maia Guterres, esplika katak formasaun ne'e destina ba tékniku Programa PDIM no PNDS husi Munisipiu sira, RAEOA no Ataúro. Nia hateten katak inisiativa ida-ne'e mosu hafoin ADN identifika dezafiu tékniku balu iha implementasaun projetu infraestrutura durante vizita servisu Governu ba Munisipiu sira. Tanba ne'e, ADN hakarak prepara rekursu umanu ne'ebé iha kompeténsia téknika atu asegura katak projetu hotu implementa ho kualidade, responsabilidade no sustentabilidade. 

Durante loron rua ne'e, partisipante sira simu matéria kona-ba planeamentu projetu, preparasaun dokumentu tékniku, prosedimentu implementasaun, supervizaun obra, kontrolu kualidade no mekanizmu monitorizasaun bazeia ba padraun ADN. Formasaun ne'e mós envolve asesór nasionál no internasionál ADN, koordenadór unidade téknika, no tékniku laboratóriu atu fahe esperiénsia prátika ba partisipante sira.

Partisipante hamutuk 56 ema, kompostu husi 28 tékniku PDIM no 28 tékniku PNDS, no iha remata programa ADN sei entrega sertifikadu ba partisipante sira ne'ebé kompleta formasaun ho susesu, nu'udar rekoñesimentu ba sira-nia kompromisu atu hasa'e profisionalizmu iha servisu públiku. 

Ho lema "Osan Povu Nian Ita Gasta Tenki Ho Responsabilidade", ADN hein katak rezultadu hosi formasaun ida-ne'e sei kontribui atu hasa'e kualidade projetu infraestrutura iha territóriu tomak, nune'e komunidade sira bele sente diretamente benefísiu hosi investimentu Governu no dezenvolvimentu nasionál ne'ebé sustentável.

(Media ADN, I.P.)