Metinaro, 24/09/2026. Koordenadór UCVQ ADN,I.P, Arq. Francisco Xavier de Deus Jerónimo, hamutuk ho Koordenadór UAP Arq. José Fernando Liu Soares, Administradór Postu Administrativu (APA) Metinaro, tékniku ADN,I.P no nain ba kompaña, hala’o survey no vizita téknika ba fatin konstrusaun Semitériu Públiku Metinaro, ne’ebé daudaun ne’e implementa husi kompaña Haksolok Unipessoal, Lda.

Atividade survey no vizita téknika ne’e iha objetivu atu observa, avalia no verifika diretamente kondisaun atúal iha área konstrusaun, inklui progresu fíziku servisu, kondisaun implementasaun obra, konformidade ho dezeñu no espesifikasaun téknika, no identifika aspetu tékniku sira ne’ebé presiza atensaun iha prosesu kontinuasaun konstrusaun.

Durante vizita ne’e, ekipa ADN,I.P hamutuk ho entidade relevante sira hala’o observasaun direta ba área obra no fó orientasaun téknika ba kompaña kona-ba servisu sira ne’ebé presiza hala’o, inklui parazén ba motorizada, kapela, salaun rua, edifísiu ba traballadór sira, parazén ba kareta funerária, Kruz Boot, sanitáriu (toilet), pasazén (landscaping), stone masonry ba trap, perfurasaun no sistema bee (boor bee), layout rate, no servisu konstrusaun komplementár sira seluk tuir nesesidade projetu.

Atividade survey ne’e realiza bazeia ba orientasaun direta husi Ministru MPIE, S.E Eng. Gastão Francisco de Sousa, no Ministru Administrasaun Estatál, S.E. Tómas do Rosário Cabral, ho objetivu atu asegura akompañamentu, koordenasaun no verifikasaun ba prosesu implementasaun konstrusaun Semitériu Públiku iha Metinaro.

Konstrusaun Semitériu Públiku Metinaro ne’e mos iha relevánsia tanba atu kontribui ba solusaun nesesidade espasu funeráriu públiku iha área Dili no Metinaro, liuliu tanba Semitériu Públiku Becuse, Becora, daudaun ne’e besik atu atinji kapasidade máxima, no tanba ne’e presiza preparasaun infraestrutura alternativu ba utilizasaun públika iha futuru.

ADN,I.P liu husi unidade téknika relevante sira, kontinua hala’o monitorizasaun, akompañamentu no verifikasaun ba projetu infraestrutura públika sira iha territóriu nasionál, ho objetivu atu promove kualidade konstrusaun, konformidade ho padraun no espesifikasaun téknika, utilizasaun efisiente rekursu públiku no sustentabilidade infraestrutura iha Timor-Leste.