Ermera, 25/09/2026. Ekipa Tékniku Ajénsia Dezenvolvimentu Nasional, Institutu Públiku (ADN,I.P) Munisípiu Ermera hala’o atividade monitorizasaun ba implementasaun projetu infraestrutura estrada iha Postu Administrativu Ermera, Munisípiu Ermera.

Atividade monitorizasaun ne’e ho objetivu atu haree no avalia diretamente kondisaun implementasaun obra iha tereñu, inklui progresu físiku, kualidade servisu, konformidade ho espesifikasaun téknika no dokumentu kontratu, nune’e mós asegura katak implementasaun projetu la’o tuir padraun no rekerimentu ne’ebé determina ona.

Iha atividade ne’e, ekipa ADN,I.P Munisípiu Ermera halo monitorizasaun ba projetu Obra Reabilitasaun Estrada Junction Aifu–Berbetulo, Chainage (Sta.) 0+000–2+500, ne’ebé lokaliza iha Postu Administrativu Ermera, Munisípiu Ermera.

Projetu ne’e hala’o hosi Jota Irmaos Unipesoál Lda sosiu ho EDM Ermera Doirema Mesak Unipesoál Lda, ho montante kontratu USD 286,769.72, no númeru kontratu KP-EO-MOP-W-24045.

Alénde ne’e, ekipa ADN,I.P mós halo monitorizasaun ba projetu Konstrusaun Estrada Rural Aifu–Lequesi, Sta. 0+000, iha Postu Administrativu Ermera, Munisípiu Ermera.

Projetu konstrusaun estrada rural ne’e responsibilidade kontratór Aimetrema Unip. Lda, ho montante kontratu USD 724,994.07, no númeru kontratu MOP-EO-26062.

Monitorizasaun ba projetu estrada rua ne’e importante atu garante katak prosesu implementasaun obra la'o tuir dezeñu no espesifikasaun téknika, standard kualidade, prazu implementasaun no kondisaun kontratu. Monitorizasaun regular mós sai mekanizmu importante atu identifika obstákulu ka problema tékniku iha terenu sedu, nune’e bele halo medida korrijitivu apropriadu.

ADN,I.P liuhusi ekipa tékniku iha munisípiu kontinua hala’o monitorizasaun no avaliasaun ba projetu infraestrutura públika, ho objetivu atu apoia asegura qualidade obra, efisiénsia implementasaun no utilizasaun rekursu públiku tuir prosedimentu no padraun ne’ebé aplika.