Baucau, 14/10/2026. Ekipa Ajénsia Dezenvolvimentu Nasional Institutu Públiku (ADN, I.P) Munisípiu Baucau hala’o inspesaun pagamentu ba projetu konstrusaun Eskola Bázika Filial (EBF) Haulela Sarabata, iha Suku Sarabata, Postu Administrativu Quelicai, Munisípiu Baucau, ne’ebé implementa husi grupu komunitáriu.

Inspesaun ne’e iha objetivu atu halo verifikasaun ba progresu no kondisaun fízika obra iha tereñu, hodi asegura katak servisu konstrusaun ne’ebé realiza iha kampu kumpre ho planu, espesifikasaun téknika no rekizitu kontratu, antes prosesu pagamentu kontinua tuir prosedimentu ne’ebé vigora.

Ekipa ADN, I.P mós halo avaliasaun ba servisu ne’ebé implementa ona, hodi kompara ho progresu fiziku obra no dokumentasaun relevante, atu asegura katak pagamentu ne’ebé sei realiza bazeia ba servisu ne’ebé efetivamente ezekuta no verifika ona.

Inspesaun pagamentu ne’e núdar parte ida husi mekanizmu monitorizasaun no kontrolu ba implementasaun projetu infraestrutura públika, ho objetivu atu promove transparénsia, responsabilidade no jestaun rekursu públiku ne’ebé efisiente.

ADN, I.P kontinua hala’o ninia knaar iha monitorizasaun no inspesaun ba projetu dezenvolvimentu, atu apoia implementasaun obra tuir padraun kualidade no asegura katak infraestrutura edukasaun ne’ebé harii bele fó benefísiu ba estudante, profesór no komunidade lokál.