Covalima, 28/10/2026. Ekipa Ajénsia Dezenvolvimentu Nasionál, Institutu Públiku (ADN, I.P) Munisípiu Covalima hala’o monitorizasaun ba projetu konstrusaun foun Postu Polísia iha Orun, Suku Ogues, Postu Administrativu Maukatar, Munisípiu Covalima, ne’ebé Ministériu Interiór mak sai núdar na’in ba projetu.

Projetu ne’e iha montante kontratu hamutuk US$ 3,767,106.21, ho durasaun implementasaun fulan 12, hahú iha tinan 2026. Implementasaun projetu ne’e hala’o husi kompaña Jedelriva Unipessoal, Lda. hamutuk ho PT. Candrawasih Abadi Makmur.

Durante monitorizasaun iha tereñu, ekipa ADN, I.P identifika katak parte fundasaun ida ho naruk 2,5 metru la kumpre padraun tékniku ne’ebé aplika ba servisu konstrusaun ne’e.

Tanba ne’e, ekipa ADN, I.P fó orientasaun ba kompaña atu halo hadi’a fali parte fundasaun ne’ebé identifika la tuir padraun tékniku, atu asegura katak servisu konstrusaun hala’o tuir espesifikasaun téknika no padraun kualidade ne’ebé determina ba projetu.

Monitorizasaun ne’e nia objetivu mak atu asegura kualidade servisu konstrusaun, kumprimentu ba espesifikasaun téknika no padraun kontratu, no garante katak infraestrutura públika ne’ebé harii bele asegura seguransa no durabilidade ba utilizadór sira.

ADN, I.P kontinua hala’o nia knaar monitorizasaun no fiskalizasaun ba implementasaun projetu infraestrutura públika, atu asegura katak rekursu Estadu uza ho responsabilidade no rezultadu servisu kumpre padraun kualidade ne’ebé determina.