Manufahi, 07/10/2026. Ekipa Laboratóriu Ajénsia Dezenvolvimentu Nasionál, Institutu Públiku (ADN, I.P), hamutuk ho Ekipa Laboratóriu Ministériu Obras Públikas (MOP), hala’o teste Sand Cone ba verifikasaun densidade no grau kompaktasaun iha parte aterru estrada, husi STA 35+530 to’o STA 35+645.

Teste ne’e hala’o iha ámbitu Projetu Reabilitasaun Estrada Nasionál Betano–Silihasan, Pakote 5, ne’ebé kobre hosi STA 30+000 to’o STA 38+656.39, iha Munisípiu Manufahi. Projetu ne’e implementa husi kompaña Tinolina Unipessoal, Lda.

Teste Sand Cone mak métodu kampu ne’ebé uza atu determina densidade materiál ne’ebé kompaktadu iha lokal konstrusaun. Teste ne’e permite tékniku sira kompara densidade ne’ebé hetan iha kampu ho densidade máxima ne’ebé materiál bele atinji, ne’ebé normalmente determina liuhusi teste laboratoriu apropriadu.

Iha prosesu teste, tékniku sira halo kuak ki’ik iha superfísie materiál ne’ebé kompaktadu. Materiál husi kuak ne’e hasai no sukat nia todan. Depois, uza areia ho densidade ne’ebé koñesidu atu determina volume husi kuak ne’e. Husi dadus todan materiál no volume kuak, bele kalkula densidade sek iha kampu.

Rezultadu densidade kampu ne’e importante atu avalia se prosesu kompaktasaun aterru hala’o ho di’ak no atinji nível ne’ebé presiza tuir espesifikasaun téknika no dokumentu kontratu.

Kompaktasaun mak prosesu mekaniku atu aumenta densidade materiál liuhusi redusaun espasu ár iha entre partíkula sira. Kompaktasaun apropriadu ajuda aumenta kapasidade suporta karga, estabilidade no rezisténsia deformasaun husi estrutura estrada.

Se aterru la kompaktadu ho sufisiente, estrutura estrada bele hetan problema hanesan asentamentu, deformasaun, rachadura no deteriorasaun prematura bainhira simu tráfiku no karga durante utilizasaun.

Tanba ne’e, teste Sand Cone sai hanesan ida husi métodu importante iha kontrolu kualidade konstrusaun, liuliu atu verifika se materiál aterru ne’ebé kompaktadu iha kampu kumpre ho kritériu densidade ne’ebé determina iha projetu.

Hala’o teste laboratoriu no verifikasaun téknika iha kampu ne’e reflete esforsu ADN, I.P no instituisaun relevante sira atu asegura katak implementasaun projetu infraestrutura rodoviária hala’o tuir padraun tékniku, espesifikasaun kontratu no rekerimentu kualidade.

Kontrolu kualidade iha kada etapa konstrusaun importante atu prevene defeitu, aumenta durabilidade infraestrutura no garante katak investimentu públiku iha infraestrutura fó benefísiu sustentável ba komunidade.

ADN, I.P sei kontinua halo monitorizasaun, inspesaun no verifikasaun téknika ba projetu infraestrutura públika iha territóriu Timor-Leste, hodi suporta realizasaun infraestrutura ne’ebé segura, resistente no ho kualidade.