ADN,I.P. Aileu Halo Inspesaun Pagamentu 100% Ba Postu Saude No Rezidensia Mediku Aikurus No Inklui Monitorizasaun Ba Konstrusaun Sentru Saude Komunitariu Remexio
- Publika husi: Celso
- Loron: 19/Oct/2026
AILEU, 19/10/2026. Ekipa Ajénsia Dezenvolvimentu Nasionál, Institutu Públiku (ADN I.P) Munisípiu Aileu, hamutuk ho tékniku saúde no reprezentante husi Kompañia TULI STAR Unipessoal, Lda hala’o inspesaun ba prosesu pagamentu 100% ba projetu konstrusaun Postu Saúde no rezidensia ba Médiku sira iha Aikurus, Remexio.
Inspesaun ne’e iha objetivu atu verifika no avalia servisu konstrusaun ne’ebé kompaña implementa, núdar parte husi prosesu kontrolu no avaliasaun téknika antes ka iha faze finalizasaun pagamentu projetu, tuir prosedimentu no rekizitu tékniku ne’ebé aplika.
Iha atividade seluk, ekipa ADN I.P Munisípiu Aileu kontinua hala’o monitorizasaun ba projetu konstrusaun Sentru Saúde Komunitária Remexio Vila, ne’ebé implementa husi Kompañia Syrus Unipessoal, Lda.
Monitorizasaun ne’e importante atu akompaña progresu fizíku projetu, avalia kualidade servisu konstrusaun no asegura katak implementasaun projetu lao tuir espesifikasaun téknika no padraun ne’ebé determina.
Liuhusi atividade inspesaun no monitorizasaun hirak-ne’e, ADN I.P Munisípiu Aileu kontinua hala’o ninia papél iha kontrolu no akompañamentu ba implementasaun projetu infraestrutura públika, liuliu iha setór saúde, atu apoia dezenvolvimentu infraestrutura ne’ebé seguru, kualidade no bele responde ba nesesidade komunidade.
Infraestrutura saúde ne’ebé konstrui ho kualidade no tuir padraun tékniku sei kontribui ba hadi’a asesu komunidade nian ba servisu saúde no kria kondisaun di’ak liu ba profisionál saúde sira atu hala’o sira-nia knaar.
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;