Dili, 23/10/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika iha Munisípiu Baucau no Viqueque, hala’o teste laboratóriu no inspesaun téknika ba projetu konstrusaun Eskola Bázika Filial (EBF) Samalari no projetu konstrusaun edifísiu Tribunál Primeira Instánsia no Rezidénsia Juís iha Munisípiu Viqueque.

Iha Munisípiu Baucau, ekipa téknika ADN, I.P hamutuk ho Laboratóriu Ministériu Obras Públikas (MOP), foti amostra betãun ho rezisténsia kompresiva ne’ebé espesifika 20 MPa ba teste laboratóriu. Teste ne’e atu verifika kualidade betãun ne’ebé sei uza ba servisu koluna iha projetu konstrusaun EBF Samalari, ne’ebé implementa husi kompaña DB Ingracia Unipessoal, Lda.

Iha Munisípiu Viqueque, iha loron 22/10/2026 ekipa téknika ADN, I.P hala’o enkontru, monitorizasaun no inspesaun konjunta ba projetu konstrusaun edifísiu Tribunál Primeira Instánsia no Rezidénsia Juís ne’ebé implementa husi kompaña Bonavide Unipessoal, Lda. (Timor-Leste), ho valór kontratu USD 4,140,329.38.

Inspesaun konjunta ne’e envolve ekipa téknika husi DG-DNE iha MOP, Laboratóriu MOP ne’ebé destaka iha Munisípiu Viqueque, PMU no reprezentante na’in projetu. Ekipa konjunta halo observasaun no verifikasaun ba servisu konstrusaun ne’ebé implementa ona, inklui armadura besi ba estaka perfurada (bored pile), sapata estaka (pile cap) no koluna (column).

Bazeia ba rezultadu inspesaun, ekipa konjunta la identifika sala iha item servisu sira ne’ebé verifika ona, tanba implementasaun servisu tuir dezeñu tékniku no espesifikasaun téknika ne’ebé aprova ona. Ho nune’e, ekipa konjunta orienta kompaña atu kontinua implementa servisu tuir dezeñu no espesifikasaun téknika ne’ebé aprova ona.

Atividade teste laboratóriu, monitorizasaun no inspesaun téknika sira-ne’e núdar parte husi responsabilidade ADN, I.P, atu akompaña implementasaun projetu infraestrutura públika, verifika kumprimentu rekezitu tékniku no asegura kualidade servisu konstrusaun tuir dezeñu no espesifikasaun téknika ne’ebé aprova ona.