Manufahi, 28/10/226. Ekipa Ajénsia Dezenvolvimentu Nasionál, Institutu Públiku (ADN, I.P) Munisípiu Manufahi hala'o monitorizasaun ba implementasaun projetu konstrusaun infraestrutura públika haat ne'ebé hela hala'o iha territóriu munisípiu ne'e.

Projetu dahuluk mak konstrusaun foun ba edifísiu eskritóriu no rezidénsia, inklui konstrusaun moru hale'u edifísiu ADN, I.P iha Munisípiu Manufahi, ne'ebé implementa husi kompanña Quintas Das Flores, Lda.

Projetu daruak mak konstrusaun foun ba edifísiu Komisaun Nasionál Eleisaun (CNE) iha Munisípiu Manufahi, ne'ebé implementa husi kompaña LGomes, Unipesoál Lda.

Projetu datoluk mak konstrusaun foun ba edifísiu eskritóriu prokuradoria no rezidénsia ba funsionáriu sira iha Letefoho, Munisípiu Manufahi, ne'ebé implementa husi kompaña Viso Dei, Unipessoal Lda.

Enkuantu projetu dahaat mak konstrusaun edifísiu Klínika Wedauberec, iha Suku Mahaquidan, Postu Administrativu Alas, Munisípiu Manufahi, ne'ebé implementa husi kompaña Wai'kbatara, Unipesoál Lda.

Monitorizasaun ne'e nia objetivu mak atu akompaña progresu implementasaun obra sira iha tereñu, verifika kumprimentu ba espesifikasaun téknika no padraun kualidade ne'ebé determina iha kontratu, no asegura katak ezekusaun obra tuir planu no prazu ne'ebé aprova.

Liuhusi atividade monitorizasaun ne'e, ADN, I.P kontinua hala'o nia knaar atu akompaña implementasaun projetu infraestrutura públika, ho objetivu atu asegura kualidade obra no utiliza rekursu públiku ho responsabilidade, transparénsia no efisiénsia.

Infraestrutura públika sira ne'e iha importánsia atu apoia funsionamentu servisu administrativu, instituisaun eleitorál, servisu justisa no prestasaun servisu saúde ba komunidade iha Munisípiu Manufahi.